Búgin májiliste depýtat Narine Mikaelian "Qazaqstan Respýblikasy men Vetnam Sotsialistik Respýblikasy arasyndaǵy ustap berý týraly shartty ratifikatsiialaý týraly" zań jobasy boiynsha qosymsha baiandamasyn bastan-aiaq qazaqsha jasap shyqty.
Mikaelian baiandamasyn jasap bolǵan soń májilis tóraǵasy Nurlan Nyǵmatýlin:
"Rahmet. Jaraisyń, Narine Gamletovna!", — dedi. Tóraǵanyń bul sózine depýtattar qol soǵyp, qoldaý kórsetti.
"Menińshe, kóptegen azamattarǵa jaqsy úlgi kórsetti. Ásirese, sol jaqta otyrǵandarǵa", — dedi Nyǵmatýlin.
Al sol jaqta zań jobasy boiynsha depýtattardyń aldynda baiandama jasap, olardyń suraqtaryna jaýap beretin memlekettik organdardyń ókilderi otyrady. Búgingi otyrysta arhiv isi máseleleri týraly zań jobasy boiynsha mádeniet jáne sport ministri Arystanbek Muhamediuly baiandamasyn tolyq derlik orys tilinde jasady. Budan bólek birqatar ministrliktiń laýazymdy tulǵalary qazaqsha qoiylǵan suraqtarǵa resmi tilde jaýap berdi.
Narine Mikaelian qazaqsha baiandaǵan zań jobasyn depýtattar maquldady. Depýtattyń aitýynsha, atalǵan zań jobasy Qazaqstannyń halyqaralyq sharttary týraly zańyna sáikes ázirlendi.
"Shart 2017 jyly 15 maýsymda Hanoida jasaldy. Bul shartta qylmyskerlerdi ekstraditsiialaý boiynsha Qazaqstan men Vetnamnyń quqyq qorǵaý organdarynyń ózara is-qimyl jasaý máseleleri retteledi. Shartqa ustap berý salasyndaǵy eýropalyq standarttar engizilgen. Sondai-aq ustap berýge ákelip soǵatyn negizder men ustap berýden bas tartý sharttary jan-jaqty retteledi. Sonymen qatar shartta ýaqytsha ustap berý men ustap berýdi keiinge qaldyrýdy retteitin normalar da bar. Ustap berý máselelerinde tikelei ózara is-qimyl jasaityn eki memlekettiń ortalyq organdary aiqyndalǵan. Qujattardy berý tártibi men olardyń ruqsat etilýi eskerilgen. Shartty ratifikatsiialaý joǵary atalǵan barlyq máselelerdiń rettelýine kepildik beredi. Bul shart bizdiń elde ekstraditsiiaǵa bailanysty rásimdik sipattaǵy kez kelgen yqtimal máselelerdi sheshýge múmkindik jasaidy. Sharttyń erejeleri elimizdiń Konstitýtsiiasyna, basqa da qoldanystaǵy zańdaryna halyqaralyq quqyqtyq normalar men qaǵidattarǵa sáikes keledi. Sonymen qatar shart eki el arasyndaǵy qylmysqa qarsy kúreste tiimdi yntymaqtastyq jasaýǵa oń áser etedi", — dep baiandady Mikaelian.
