Búgin Palata spikeri Nurlan Nyǵmatýlinniń tóraǵalyǵymen ótken jalpy otyrysta Úkimet pen Esep komitetiniń 2020 jylǵa arnalǵan esepteri tyńdaldy, dep habarlaidy "Ult aqparat" Májilistiń baspasóz qyzmetine silteme jasap.
Onda Májilis tóraǵasy respýblikalyq biýdjetti igerýdiń ózekti máselelerine toqtalyp:
- Byltyrdan beri elimizde qalyptasqan jaǵdai barshańyzǵa belgili. Búkil álemdi qamtyǵan koronovirýs pandemiiasy bizdiń ómirimizge de kóptegen ózgerister alyp keldi. Biraq ta, elimizdi damytý, halqymyzdy qorǵaý jolyndaǵy maqsattar, mindetter, jumystar bir kúnge de toqtaǵan joq. Sondyqtan, áleýmettik-ekonomikalyq turaqtylyqty saqtaýǵa qatysty jumystar der kezinde qolǵa alyndy, - dedi.
Nurlan Nyǵmatýlin halyqty qoldaý úshin daǵdarysqa qarsy sharalar qabyldanǵanyn, ol qarajattar barlyq áleýmettik mindettemelerdi júzege asyrýǵa jáne otandyq ekonomikany qoldaýǵa yqpal etkenin aitty. Máselen, atalǵan kezeńde Ulttyq qordan kepildendirilgen transfert retinde 4,8 trillion teńge bólingen.
Úkimet qabyldaǵan daǵdarysqa qarsy sharalar elimiz boiynsha jumyssyzdyqty 4,9% deńgeiinen asyrmaýǵa jáne ortasha ailyq jalaqyny 7,3% - ǵa ulǵaitýǵa jol ashty. Aýyl sharýashylyǵy óndirisiniń ósimi 5,6% qurady.
Alaida, Nurlan Nyǵmatýlin biýdjettiń oryndalýynda áli oryn alǵan kemshilikter baryn alǵa tarta kelip, memleket qarajatyn utymdy, nátijeli jáne tiimdi igerý kerektigine basa nazar aýdardy.
Sonymen qatar otyrys barysynda halyqty ýaqytsha jumyspen qamtý sharalaryna qatysty birqatar máseleler basty nazarda boldy.
Esep komitetiniń qorytyndysy boiynsha «Jumyspen qamtýdyń jol kartasy» aiasynda 2020 jyly 239 myń adam jumysqa ornalastyrylǵan.
Alaida, jobalardyń qysqa merzimdiligine bailanysty qazirdiń ózinde 158 myń adam jumystan bosatyldy. Al jumysqa ornalasqandardyń 17%-y bir ai ǵana jumys istegen.
Osy rette, Nurlan Nyǵmatýlin bul bar-joǵy 4,5 paiyz ǵana qurap otyrǵanyn alǵa tarta kelip:
- Áiteýir «eki qolǵa bir kúrek»,- dep, ýaqytsha jumysqa alyp baramyz.
Biraq ta, ony turaqty sheshim dep aitýǵa bolmaidy. Sebebi, qalǵan ýaqytta, mysaly, kúzde, qysta ne isteidi? Ol kezde de jumys isteý kerek qoi, ol kezde de otbasyn asyraý kerek qoi, - dedi.
Palata spikeriniń pikirinshe, halyqty turaqty, tiimdi, sapaly eńbekpen qamtamasyz etý kerek. Bul jumys esep berý úshin, baiandama úshin emes, shyn máninde, halyqtyń jaǵdaiyn jaqsartý úshin qajet.
Osyǵan orai, Májilis tóraǵasy áleýmettik qorǵaý ministrine atalǵan máselelerge ásirese, turaqty jumystarǵa erekshe nazar aýdarý qajettigin eskerte otyryp, osy jumysty durys uiymdastyrý kerektigin aitty.
