Qazaqstan Parlamenti tómengi palatasynyń spikeri Nurlan Nyǵmatýlin aýyl ákimderi arasyndaǵy jemqorlyq jaiynda pikir bildirdi, - dep habarlaidy "Ult aqparat" Tengrinews.kz saityna silteme jasap.
Tómengi palatanyń jalpy otyrysynda jergilikti ózin-ózi basqarýdy damytý boiynsha zań jobasy qaralyp jatyr. Bul zań jobasy 2018 jyldan bastap jergilikti ózin-ózi basqarýdyń óz biýdjetin engizýdi qarastyrady.
"Aýyl, aýyldyq okrýg deńgeilerinde kommýnaldyq menshik týraly tórtinshi deńgeili biýdjet ideiasy júzege asýy úshin adamdardyń oǵan daiyn bolýy kerektigimen sózsiz kelisemiz. Osyǵan bailanysty birqatar shara qabyldanyp jatyr. Treningter ótip, aýyl ákimderin oqytý júrgizilý ústinde, anyqtama nemese kitapsha shyǵaramyz dep kelistik. Sonymen birge, osy máselege júieli túrde qaraýymyz kerek. Merzimi boiynsha belgili bir máseleler bar. Osy sharalar kesheniniń arqasynda sóz ben iste aiyrma bolmaidy dep úmittenemin", - dedi QR UEM basshysy Timýr Súleimenov.
Ministrdiń bul sózine qatysty Májilis spikeri Nurlan Nyǵmatýlin bylai dep jaýap qatty.
"2,5 myń ákimge 110 milliard teńgeden asa aqsha túsedi. Olardyń qyzmetine kommýnaldyq ielikti basqarý da kiredi. Oqytýdy kim jáne qashan júzege asyrady? Mundai qarajatty kórmegen aýyldyń baiǵus ákimin eshkim de kitapshamen, treningpen, aqparattyq toptarmen daiyndai almaidy. Kitapsha emes, kitap syilasańyz da", - dedi ol.
Aitýynsha, aýyl ákimderin biýdjet pen kommýnaldyq ielik protsesin saýatty basqarýǵa úiretý kerek.
"Eger olar bul jobasy usynyp otyrǵan aqsha aǵymdaryn basqarýdyń osy quraldaryn paidalana almasa, biz kem degende aqshany tiimdi jumsamaýdyń kýási bolamyz. Al osy aýyl ákimderi daiyndyǵy joqtyǵynan antikorrýptsiia qyzmetiniń "klienti" bolýy múmkin. Ne aityp otyrǵanymyzdy túsinesiz be? Bizge antikorrýptsiia qyzmetiniń "klientteri" emes, daiyn ákimder kerek", - dep qorytty sózin Nyǵmatýlin.
