QR Parlamenti Májilisiniń tóraǵasy Nurlan Nyǵmatýlin bilik ókilderine baǵynbaǵany úshin aiyppul kólemin arttyrýǵa qarsylyq bildirdi.
Bul jaiynda ol palatanyń búgingi jalpy otyrysynda «Qazaqstan Respýblikasynyń keibir zańnamalyq aktilerine quqyq qorǵaý júiesin jetildirý máseleleri boiynsha ózgerister men tolyqtyrýlar engizý týraly» zań jobasyn talqylaý barysynda málim etti, dep habarlaidy Ult.kz tilshisi QazAqparat agenttigine silteme jasap.
«Memleket basshysy aýyr emes nemese ortasha aýyrlyqtaǵy qylmystyq qylyqtar úshin jazany jeńildetý maqsatyn qoidy. Onyń ornyna zań jobasynda aiyppuldardy qatańdatyp, onyń kólemin 11 mln. teńgege deiin arttyrý usynylyp otyr», - dedi N. Nyǵmatýlin.
Zań jobasynda tótenshe jaǵdai jáne lańkestikke qarsy operatsiia aimaǵynda bilik ókiline qatysty kúsh kórsetken nemese baǵynbaǵany úshin jaza qatańdatylady. Quqyq qorǵaý, arnaýly memlekettik organdar qyzmetkerleriniń jáne áskeri qyzmetshiniń ómirine qolsuǵýshylyq úshin jaýaptylyq belgilenedi.
Bilik ókiline baǵynbaǵany úshin aiyppuldy júz AEK-ten eki júz AEK-ke deiin arttyrý usynylyp otyr, al ómirge nemese densaýlyqqa qaýipti emes kúsh kórsetkeni úshin eki myń AEK-ten bes myń AEK-ke deiin kóterý eskerilgen.
Osy oraida Nyǵmatýlin aiyppuldy arttyrý óz kezeginde qylmystylyqty tómendetýge kepildik bermeitinin aita kele, zań jobasyn ekinshi oqylymda qarastyrý kezinde tiisti túzetýler engizýdi usyndy.
.jpeg)