Búgin Májilis Spikeri Nurlan Nyǵmatýlinniń tóraǵalyǵymen jalpy otyrys ótti. Onda depýtattardyń ózderi bastamashy bolǵan aýyldy sapaly internetpen qamtý týraly zań jobasy birinshi oqylymda maquldandy, dep habarlaidy tómengi palatanyń baspasóz qyzmeti.
Atalǵan zań jobasynda eldimekenderdi uialy bailanyspen qamtyp, jeliniń sapasyn arttyrý úshin bailanys operatorlaryna telekommýnikatsiialyq infraqurylymdy birlesip paidalaný usynylady.
Osy jóninde Májilis Tóraǵasy Nurlan Nyǵmatýlin: «Elimizdiń tsifrlyq damý jolynda internet máselesiniń basty nazarda ekenin ózderińiz jaqsy bilesizder. Ásirese, aýyldy jerlerdi sapaly internetpen qamtamasyz etý — búgingi kúnniń basty talaby. Sebebi, Memleket basshysy Qasym-Jomart Toqaev Ulttyq keńes otyrysynda bilim jáne densaýlyq salalaryn zamanǵa sai reformalaý týraly aitqan bolatyn. Osy jolda, árine, tsifrlyq jáne elektrondyq qyzmetterdiń qajettiligi óte mańyzdy», - dedi.
Nurlan Nyǵmatýlin atap ótkendei, osy zań jobasy aýyl turǵyndaryn sapaly jáne qoljetimdi internetpen qamtamasyz etýge jańa serpin beretini sózsiz.
Jalpy, bul qujat aýyldyq eldimekenderdi internetke keńjolaqty qoljetimdilikpen qamtamasyz etý maqsatynda ázirlengen.
Sonymen qatar, bailanys obektilerin salý kezinde jer ýchaskelerin resimdeý boiynsha ruqsat berý rásimderin ońailatýǵa jáne bailanys operatorlarynyń barlyǵyna telekommýnikatsiialyq infraqurylymǵa teń qol jetkizý múmkindigin berýge baǵyttalǵan.
