Aýyr qylmystardyń barlyq túrleri úshin jazany qataitý azamattardyń quqyǵy men qaýipsizdigin zań jaǵynan qorǵaýǵa múmkindik beredi. Bul týraly Parlament Májilisiniń tóraǵasy Nurlan Nyǵmatýlin málim etti, dep habarlaidy "Ult aqparat".
Aita keteiik, búgin jalpy otyrysta palata depýtattary «Qazaqstan Respýblikasynyń keibir zańnamalyq aktilerine qylmystyq jáne qylmystyq-protsestik zańnamany jetildirý máseleleri boiynsha ózgerister men tolyqtyrýlar engizý týraly» zań jobasyn talqylap, birinshi oqylymda maquldady.
«Búgin birinshi oqylymda maquldanǵan mańyzdy zań jobasy eń aldymen Memleket basshysy Qasym-Jomart Toqaevtyń Joldaýda Úkimetke jáne Parlamentke bergen tapsyrmalaryn oryndaýdy qamtamasyz etetin bolady. Jobada esirtki taratý, adam saýdasy jáne jeke tulǵaǵa qarsy basqa da aýyr qylmystar úshin jazany qataitý qarastyrylǵan. Alǵash ret mal urlyǵyna qatysty qylmystyq norma engizildi. Búgin jalpy otyrysta aitylǵan aýyr qylmystardyń barlyq túrleri úshin jazany qataitý erejeleri azamattardyń quqyǵy men qaýipsizdigin zań jaǵynan qorǵaýǵa múmkindik beredi dep senemiz», - dedi Nurlan Nyǵmatýlin.
Aita keteiik, urlyqqa qatysty áreketter aýyr qylmystar sanatyna kóshetini málim boldy.
Bul turǵyda mal urlyǵyna erekshe nazar aýdarylyp otyr.
Sonymen qatar, inspektordy jáne qoryqshynyń ómirine qaýip tóndirip, kúsh qoldanǵany úshin jaýapkershilik engizý qarastyrylǵan. Osyndai qylmystar úshin jiyrma jylǵa deiin bas bostandyǵynan aiyrylmaq.
Zań jobasynda pedofilderdi ómir boiy bas bostandyǵynan aiyrý eskerilgen.
Ákimshilik quqyq buzýshylyq kodeksine mas kúiinde kólik aidaǵany úshin 30 táýlikke deiin ákimshilik qamaý merzimi uzartylyp, júrgizý quqyǵynan aiyrý merzimi segiz jylǵa ulǵaiady.
«Ekinshi oqylymǵa deiin aýqymdy jumystardy atqarý qajetti bar. Osy oraida Memleket basshysynyń tapsyrmalaryn tolyqtai júzege asyrý nazarǵa alynady», - dedi Májilis tóraǵasy.
