Búgin Májilis tóraǵasy Nurlan Nyǵmatýlin Amerika Qurama Shtattarynyń Qazaqstandaǵy Tótenshe jáne Ókiletti elshisi Ýiliam Mozerdi qabyldady, dep habarlaidy Májilistiń baspaóz qyzmeti.
Taraptar ekijaqty qarym-qatynasty, sonyń ishinde, parlamentaralyq yntymaqtastyqty nyǵaitýdyń ózekti máselelerin talqylady.
N. Nyǵmatýlinniń pikirinshe, Amerika elimen jan-jaqty ári ózara tiimdi qatynasty nyǵaitý bizdiń elimizdiń syrtqy saiasatynyń mańyzdy baǵyttarynyń biri. Aǵymdaǵy jyly qos memleket arasynda diplomatiialyq qatynastyń ornaǵanyna 28 jyl tolady. Osy ýaqyttar ishinde, senimdi saiasi dialog ornap, ekijaqty bailanys keńeitilgen strategiialyq áriptestik deńgeiine jetti.
Palata tóraǵasy atap ótkendei, 2018 jyly Qazaqstannyń Tuńǵysh Prezidenti Nursultan Nazarbaevtyń AQSh-qa resmi sapary bizdiń elderimiz arasyndaǵy yqpaldastyqtyń airyqsha sipatyn kórsetti.
Saýda-ekonomikalyq salany sóz etkende, N. Nyǵmatýlin ekijaqty taýar ainalymy 2018 jyly 2,25 mlrd. dollarǵa jetkenin, ótken jylmen salystyrǵanda 37 paiyzǵa óskenin alǵa tartty.
Májilis tóraǵasynyń aitýynsha, eki memlekettiń investitsiialyq yntymaqtastyǵynda qarjy sektory, kólik, kommýnikatsiia, taý-ken óndirisi, farmatsevtika salalary basym baǵyttarǵa ie.
Májilis Spikeri elderimiz arasyndaǵy parlamentaralyq ózara is-qimyldy tereńdetýdiń mańyzdylyǵyn aitty.
Májiliste AQSh-pen yntymaqtastyq jónindegi top jumys isteidi. Amerikada qurylǵan «Qazaqstan dostary tobymen de» belsendi áriptestik bar.
N. Nyǵmatýlin zańnamalyq tájiribeni meńgerý jáne etene bailanys ornatý maqsatynda atalǵan toptar men beiindi komitetter deńgeiinde saparlar almasý pratikasyn engizýdiń qajettiligine toqtaldy.
Sondai-aq, Májilis Spikeri AQSh Kongresi qarjylandyratyn «Ashyq álem» baǵdarlamasynyń da depýtattar men apparat qyzmetkerleri úshin quqyqtyq jáne kásibi tájiribe almasýdyń erekshe múmkindigi ekenin atap ótti.
Taraptar birlesken syndarly jumys - parlamentaralyq bailanystardy, sonymen birge, ekijaqty qatynastardy nyǵaitýǵa keń jol ashatynyna senimdi.
