Kásiptik standarttar mindetti túrde dýaldy oqytý júiesinde paidalanylýǵa tiis. Bul týraly búgin QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
«Búgingi tańdaǵy ózekti máseleniń biri – bolashaq túlektiń eńbek naryǵynda suranysqa ie bolýy. Bizdiń aldaǵy mindetimiz – Bilim jáne ǵylym ministrligimen birlesip kadr daiarlaý júiesin jumys berýshilerdiń talaptaryna beiimdeý jáne kásiptik standarttar negizinde bilim berý baǵdarlamalaryn ázirleýdi bastaý. Bul rette kásiptik standarttar mindetti túrde dýaldyq oqytý júiesinde paidalanylýy tiis. Sonymen qatar, jumyskerlerdi sertifikattaý jáne biliktiligin rastaý - mańyzdy máseleniń biri bolyp otyr», - dedi ministr QR Premer-Ministri Asqar Maminniń tóraǵalyǵymen ótken Kásiptik standarttar ázirleý máseleleri jónindegi ulttyq keńes otyrysynda.
Onyń atap ótýinshe, búgingi kúni mamandardy sertifikattaý jumysy jeke-jeke júrgiziledi. Sertifikattaý ortalyqtaryna biryńǵai talaptar qoiylmaǵan jáne biliktilikti taný tártibi bekitilmegen. Jalpy ádisnamalyq quraldar joq. Osynyń bári Qazaqstanda biliktilikti tanýdy qiyndatyp otyr.
«Ministrlik biryńǵai sertifikattaý jáne biliktilikti taný júiesine kóshýdi qamtamasyz etý boiynsha jumysty bastady. Memlekettik organdar men salalyq qaýymdastyqtar bergen usynystar negizinde retteletin kásipter tiziliminiń jobasy ázirlenip, oǵan shamamen 43 kásip engizildi. Sonymen qatar, Ulttyq biliktilik júiesin basqarýdyń 3 satyly modelin qalyptastyrý máselesi pysyqtalýda. Atap aitqanda: Biliktilik jónindegi ulttyq keńes; Ulttyq biliktilik organy, salalyq keńester. Bulardy normativtik turǵydan bekitý jóninde usynystar Úkimetke osy jyldyń sońyna deiin engiziledi», - dedi Birjan Nurymbetov.
