Qazirgi kezde elimizde kitaphanalardaǵy kitaptardy jáne arhivterdegi qujattar men jazbalardy saqtaý, tsifrlandyrý isinde aitarlyqtai olqylyqtar bar. Senator Nurtóre Júsip Premer-Ministrdiń orynbasary Eraly Toǵjanovtyń atyna joldaǵan depýtattyq saýalynda osy máseleni kóterdi, dep habarlaidy "Ult aqparat".
Senatordyń aitýynsha, búginde otandyq kitaphanalar men muraǵattarda qujattar men jazbalardy saqtaý isine jetkilikti kóńil bólinbeidi. Tipti elordadaǵy Ulttyq arhivke qarasty Qoljazbalar men sirek kitaptar ulttyq ortalyǵynda qoljazbalar men sirek kitaptar saqtaityn jer óte tar.
«Qor kóbeigen saiyn, ǵimaratqa syimai barady. Ortalyqtyń ǵimaraty eýropalyq talaptarǵa múldem sai emes. Onyń ústine, kórermenderge arnap daiyndaǵan kórmesi de kishkentai. Sondyqtan kitap qory kóbeigen saiyn ortalyqta ǵylymi saraptamalyq topty ulǵaitý kerek», – dedi Nurtóre Júsip.
Saýal barysynda senator elimizde restavratsiia salasyn jetildirý, osy baǵytta maman daiarlaý, aimaqtardaǵy arhivterdiń jaǵdaiyn jaqsartý máselelerine de nazar aýdardy.
Sonymen qatar ol kitaptar men qujattardy tsifrlandyrý isi kóńil kónshitpeitinin aitty.
«Kópshiliginiń sapasy nashar jáne oqylýy qiyn. Oblystardaǵy kei arhivterdiń saity da joq. Shet elderdegidei arhiv qujattarymen onlain tanysý múmkin emes. Bizde sovet kezinen qatyp qalǵan kóptegen tyiymdar bar. Sonyń biri – kóshirmeler jasaýǵa tyiym salý», – degen depýtat sonyń saldarynan pandemiia kezinde elimizdegi ǵylymi jumystar aitarlyqtai zardap shekkenin jetkizdi.
Senator bul máselelerdi Mádeniet jáne sport ministrligi men Bilim jáne ǵylym ministrligi birlese qolǵa alyp, jetildirý kerektigin tilge tiek etti. Sondai-aq, elimizde qoljazbalar, sirek kitaptar, basqa da qundy qujattardy tsifrlandyryp, olardyń qoljetimdiligin qamtamasyz etý jáne halyqtyń qajetine jaratý qajet ekenin atap ótti.
