قازٸرگٸ كەزدە ەلٸمٸزدە كٸتاپحانالارداعى كٸتاپتاردى جەنە ارحيۆتەردەگٸ قۇجاتتار مەن جازبالاردى ساقتاۋ, تسيفرلاندىرۋ ٸسٸندە ايتارلىقتاي ولقىلىقتار بار. سەناتور نۇرتٶرە جٷسٸپ پرەمەر-مينيستردٸڭ ورىنباسارى ەرالى توعجانوۆتىڭ اتىنا جولداعان دەپۋتاتتىق ساۋالىندا وسى مەسەلەنٸ كٶتەردٸ, دەپ حابارلايدى "ۇلت اقپارات".
سەناتوردىڭ ايتۋىنشا, بٷگٸندە وتاندىق كٸتاپحانالار مەن مۇراعاتتاردا قۇجاتتار مەن جازبالاردى ساقتاۋ ٸسٸنە جەتكٸلٸكتٸ كٶڭٸل بٶلٸنبەيدٸ. تٸپتٸ ەلورداداعى ۇلتتىق ارحيۆكە قاراستى قولجازبالار مەن سيرەك كٸتاپتار ۇلتتىق ورتالىعىندا قولجازبالار مەن سيرەك كٸتاپتار ساقتايتىن جەر ٶتە تار.
«قور كٶبەيگەن سايىن, عيماراتقا سىيماي بارادى. ورتالىقتىڭ عيماراتى ەۋروپالىق تالاپتارعا مٷلدەم ساي ەمەس. ونىڭ ٷستٸنە, كٶرەرمەندەرگە ارناپ دايىنداعان كٶرمەسٸ دە كٸشكەنتاي. سوندىقتان كٸتاپ قورى كٶبەيگەن سايىن ورتالىقتا عىلىمي ساراپتامالىق توپتى ۇلعايتۋ كەرەك», – دەدٸ نۇرتٶرە جٷسٸپ.
ساۋال بارىسىندا سەناتور ەلٸمٸزدە رەستاۆراتسييا سالاسىن جەتٸلدٸرۋ, وسى باعىتتا مامان دايارلاۋ, ايماقتارداعى ارحيۆتەردٸڭ جاعدايىن جاقسارتۋ مەسەلەلەرٸنە دە نازار اۋداردى.
سونىمەن قاتار ول كٸتاپتار مەن قۇجاتتاردى تسيفرلاندىرۋ ٸسٸ كٶڭٸل كٶنشٸتپەيتٸنٸن ايتتى.
«كٶپشٸلٸگٸنٸڭ ساپاسى ناشار جەنە وقىلۋى قيىن. وبلىستارداعى كەي ارحيۆتەردٸڭ سايتى دا جوق. شەت ەلدەردەگٸدەي ارحيۆ قۇجاتتارىمەن ونلاين تانىسۋ مٷمكٸن ەمەس. بٸزدە سوۆەت كەزٸنەن قاتىپ قالعان كٶپتەگەن تىيىمدار بار. سونىڭ بٸرٸ – كٶشٸرمەلەر جاساۋعا تىيىم سالۋ», – دەگەن دەپۋتات سونىڭ سالدارىنان پاندەمييا كەزٸندە ەلٸمٸزدەگٸ عىلىمي جۇمىستار ايتارلىقتاي زارداپ شەككەنٸن جەتكٸزدٸ.
سەناتور بۇل مەسەلەلەردٸ مەدەنيەت جەنە سپورت مينيسترلٸگٸ مەن بٸلٸم جەنە عىلىم مينيسترلٸگٸ بٸرلەسە قولعا الىپ, جەتٸلدٸرۋ كەرەكتٸگٸن تٸلگە تيەك ەتتٸ. سونداي-اق, ەلٸمٸزدە قولجازبالار, سيرەك كٸتاپتار, باسقا دا قۇندى قۇجاتتاردى تسيفرلاندىرىپ, ولاردىڭ قولجەتٸمدٸلٸگٸن قامتاماسىز ەتۋ جەنە حالىقتىڭ قاجەتٸنە جاراتۋ قاجەت ەكەنٸن اتاپ ٶتتٸ.
