Eldiń ishki qýatyna kóp nárse bailanysty. QR Prezidentiniń Joldaýyna orai Senat depýtaty Nurtóre Júsip osyndai pikir bildirdi, dep habarlaidy QazAqparat.
«Prezidenttiń biylǵy Joldaýy tarihi mánge ie. Qańtar dúrbeleńinen keiin bir jaǵy úrei, bir jaǵy úmit qushaǵynda qalǵan jurttyń eńsesi kóterildi. Sanaǵa silkinis ákeldi. Senim oty tutandy. Joldaýdyń túiindi tusynda Prezident Qasym-Jomart Toqaev: «Biz ár qadamymyzdy saralap, tańdaǵan jolymyzben alǵa senimdi qadam basamyz. Biz jańa Qazaqstanda «túrli kózqaras, biraq birtutas ult» qaǵidatyn berik ustanýǵa tiispiz. Bir-birimizdi jat kórmei, jaqyn tartyp, qoǵamda naqty ózgeristerge degen senimdi ornyqtyramyz. Jurtymyzdyń kúsh-jigerine, daryny men eńbekqorlyǵyna súienemiz. Ár azamattyń óz qabiletin iske asyrýyna barynsha qolaily jaǵdai jasaimyz. Biz osylaisha ǵana halqymyzdyń jasampazdyq áleýetin arttyra alamyz. Osylaisha ǵana ómirdiń barlyq salasyn ózgertip, reformalar dáýirin óz qolymyzben jasaimyz. Biz kez kelgen syn-qaterdi birge eńserip, Qazaqstanymyzdyń qýatyn birge arttyramyz dep senemin» dedi. Halqymyz mundaida «Jumyla kótergen júk jeńil» deitin. Shyn máninde halyqtyń ishki qýatyna kóp nárse bailanysty. Qazir qaýip-qater jan-jaqtan tóngen kez. Álemdik saiasat myń qubylyp tur. Rýstiń eki balasy bir-birine qanjar kezep tur. Irgedegi alyp memleketke salynǵan sanktsiialar salqyny Qazaqstanǵa da timei qalmaityn siiaqty...Teńge teńselip, azyq-túlik qymbattap barady. Alda kóktemgi jer jyrtý, egin egý tárizdi kezek kúttirmes sharýalar bar. Memlekettiń azyq-túlik qaýipsizdigin qamtamasyz etý Úkimettiń aldynda turǵan birinshi kezektegi mindet. «Toq bala ash balamen oinamas» degendei, eldiń toqtyǵy, áleýmettik jaǵdaiy kún tártibinen túspeýi tiis», - dedi senator.
Onyń atap ótýinshe, Memleket basshysy óz Joldaýynda barlyq máseleni ashyq aitty.
«Biz ádette jyl saiynǵy Joldaýdan soń jelpildegen jiyndarǵa iek artamyz. Onyń arty jalǵan aqpar berýge, bolmaǵandy boldy, tolmaǵandy toldy deýge ulasady. Memleket basshysy óz Joldaýynda barlyq máseleni ashyq aitty. Naqty aitty. Bir is bolsa da bitkeni jaqsy. «Erteń jaqsy bolady, nemese 2030-da jaqsy ómir súremiz» degen buldyr da bulyńǵyr úmitpen ómir súrýge bolmaidy. Osy rette Prezident «Men azamattarymyzdyń erteń emes, búgin baqytty ómir súrgenin qalaimyn. Eń bastysy – elimizdiń egemendigi! Shyn máninde, biz úshin Qazaqstannyń Táýelsizdigi bárinen qymbat. Osy turaqsyz, qubylmaly álemde Qazaqstanymyz bizden basqa eshkimge kerek emes. Sondyqtan maǵan elimniń amandyǵy men jerimniń tutastyǵynan asqan eshbir qundylyq joq» dedi. Osy Joldaý jariialanǵanǵa deiin el-jurt «Endi ne bolar eken, erteńimiz qalai bolady, qandai saiasi ózgerister jasalady?» dep kúpti kóńilde boldy», - dedi ol.
Nurtóre Júsip Prezident Joldaýynda eldi eleń etkizgen kóptegen jańalyqtar bolǵanyna nazar aýdartady.
«Abai, Ulytaý oblystarynyń qurylýy, Almaty jáne Jetisý oblystarynyń irgesi ajyrap, jańa aýmaqtyq-ákimshilik qurylymǵa ainalýy halyqtyń kókeiinen shyqty. Qapshaǵai qalasyna Dinmuhammed Qonaev esimin berý týraly usynys ta óte oryndy. Memleket basshysy: «Maqsatqa jetý úshin memlekettik apparatty jańartý nemese kadrlyq aýys-túiis jasaý jetkiliksiz. Ózgeristi árqaisymyz ózimizden bastaýymyz kerek. Árbir adam jáne búkil qoǵam jańǵyrýy qajet. Qundylyqtarymyz túbegeili jańarýǵa tiis. Munyń bári – ońai jumys emes, birtindep qalyptasyp, jyldar boiy jalǵasatyn úderis. Bul jumys bizden joǵary jaýapkershilikti, elimizge jáne bir-birimizge degen janashyrlyqty talap etedi. Bizge eshkim syrttan kelip, eshteńe jasap bermeitini anyq, bári óz qolymyzda. Sondyqtan barshańyzdy jańa Qazaqstandy qurýǵa bir kisidei jumylýǵa shaqyramyn. Halyqtyń qoldaýymen maqsatymyzǵa jetemiz dep senemin» degende qoǵamdaǵy ózgeristerdi jasaýda jurttyń jumyla kirisýi qajettigin meńzep otyr. Ult ustazy Ahmet Baitursynulynyń «Jurt jumysy – qumyrsqanyń ileýindegi jumysqa uqsaidy: qumyrsqasha jabyla tynbai istese ónedi. Ultyn kerek qylyp, halyqqa qyzmet qylamyn degen qazaq balalary qazaq jumysyna qolynan kelgenshe qarap turmai kirisip istei berse – ult jumysy ulǵaiyp, tolyqpaqshy», - degen ataly sózi bar. Bizge de tynymsyz tirlik, turaqty birlik qajet», - dedi senator.
Sonymen qatar ol Prezident bastamalary men usynystary óte aýqymdy ekendigin de basa aitty.
«Elimizdiń saiasi júiesi men ákimshilik-aýmaqtyq qurylymynda birqatar eleýli ózgerister bolady. Memleket basshysy usynǵan sharalardy júzege asyrý úshin Konstitýtsiianyń 30-dan astam babyna ózgeris engizý qajet. Sondai-aq jyldyń sońyna deiin taǵy 20-dan astam zań qabyldaý kerek. Parlament depýtattary osy baǵytta aianbai jumys isteidi degen oidamyn», - dedi Nurtóre Júsip.
