Nursultan Nazarbaevtyń tóraǵalyǵymen Qaýipsizdik keńesiniń otyrysy ótti, dep habarlaidy "Ult aqparat".
Jiynda elimizdiń áleýmettik-ekonomikalyq damýyna jáne ekologiialyq qaýipsizdikti qamtamasyz etýge qatysty máseleler qaraldy.
Nursultan Nazarbaev álemdik qoǵamdastyqtyń elimizdegi saiasi oqiǵalarǵa zor qyzyǵýshylyq bildirgenin aitty.
– Men tarihymyzdyń osy bir betburysty kezeńinde qazaqstandyqtardyń parasattylyq jáne bereke-birlik tanytqanyna shynaiy rizashylyǵymdy bildiremin. Osy kúnderi meniń atyma memleket jáne qoǵam qairatkerlerinen, elimizdiń eńbek ujymdarynan kóptegen hattar men jedelhattar kelip túsýde. Shet memleketterdiń jáne halyqaralyq uiymdardyń basshylary telefon arqyly habarlasyp, qoldaý bildirip jatyr, – dedi Elbasy.
Qazaqstannyń Tuńǵysh Prezidenti elimizdiń ósip-órkendeýine jáne ornyqty damýyna baǵyttalǵan baǵdardan memleketimiz ainymaitynyna senim bildirdi.
– Biz barlyq synaqtan abyroimen ótip, tabysty memleket qura bildik. Ony búkil álem biledi ári qurmetteidi. Men qazirgi Qazaqstannyń negizin qalaǵandyqtan memleketimizdiń bolashaǵyna jáne azamattarymyzdyń ál-aýqatyna basa mán beremin. Meniń barlyq is-áreketim jáne qadamym osyǵan arnalǵan, – dedi Nursultan Nazarbaev.
Qaýipsizdik keńesiniń Tóraǵasy Qazaqstan halqynyń múddesi úshin strategiialyq baǵdarlamalardy odan ári júzege asyrýdyń mańyzdylyǵyn atap ótti.
– Baǵdarlamalardy júieli iske asyrý – damýymyzdyń basty talaby. Biz azamattardy turǵyn úimen, jumyspen, sapaly meditsinalyq kómekpen jáne bilimmen qamtamasyz etip, muqtaj adamdarǵa qoldaý kórsetý úshin tiisti jumystardy jalǵastyra beremiz. Munyń bári – jarqyn bolashaqqa degen investitsiia, – dedi Elbasy.
Qazaqstannyń Tuńǵysh Prezidenti el ekonomikasyn odan ári damytý jáne jahandyq syn-qaterlerdi eńserý úshin jaqsy múmkindikter bar ekenin aitty.
Basqosýda, sondai-aq, Premer-Ministrdiń birinshi orynbasary Á.Smaiylov jáne Energetika ministri Q.Bozymbaev baiandama jasady.
Elbasy óńirlerdegi ekologiialyq jaǵdaidy tiisti baqylaýda ustaý jáne osy saladaǵy zańnamanyń buzylýyna jol bermeý qajettigine nazar aýdardy. Nursultan Nazarbaev bul sharalar, eń aldymen, halyqtyń turmys sapasyn jaqsartýǵa baǵyttalǵanyn atap ótti.
Otyrys qorytyndysy boiynsha Úkimetke, oblystardyń, Nur-Sultan, Almaty, Shymkent qalalarynyń ákimderine naqty tapsyrmalar berildi.
