Elordada Qazaqstan Prezidenti Nursultan Nazarbaevtyń qatysýymen Astana klýbynyń úshinshi otyrysy bastaldy, dep habarlaidy QazAqparat.
«Forýmnyń jumysyna Túrkiianyń eks-prezdenti Abdolla Gúl, Chehiianyń eks-rezidenti Vatslav Klaýs, Sloveniianyń eks-prezidenti Danilo Tiýrk, sondai-aq kórnekti qoǵam jáne memleket qairatkerleri, álemniń jetekshi sarapshylary, belgili saiasatkerler men diplomattar qatysyp otyr. Búgingi otyrys álemdik úrdisterdi qaita paiymdaýǵa, sonyń ishinde Eýraziianyń kúntártibin taldaýǵa jaqsy múmkindik berip otyr», - dedi otyrysty ashqan QR Parlamenti Senatynyń Tóraǵasy Qasym-Jomart Toqaev.
Sonymen qatar ol Astana klýby úshinshi otyrysyna qatysýǵa kelisimin bergeni úshin Elbasy Nursultan Nazarbaevqa rizashylyǵyn bildirip ótti.
Astana klýbynyń úshinshi otyrysynyń basty taqyryby - «Úlken Eýraziia» transformatsiiasy: aldaǵy onjyldyqta eýraziialyq keńistikti qalyptastyratyn geosaiasi, aimaqtyq, ekonomikalyq jáne tehnologiialyq trendter. Astana klýbynyń otyrystary «Chatham house» erejesi boiynsha ótkiziledi. Biylǵy jyly onyń beldi saiasatkerler men sarapshylardan turatyn qatysýshylary jahandyq úrdister men Eýraziiaǵa yqpal etip jatqan eń ózekti máseleler boiynsha sheshimder izdemek.
Astana klýby QR Tuńǵysh Prezidenti - Elbasy qorynyń jetekshi halyqaralyq ǵylymi ortalyqtar Qytai qazirgi zamanǵy halyqaralyq qatynastar akademiiasy, Germaniia syrtqy saiasat keńesi, Resei halyqaralyq ister keńesi jáne Halyqaralyq beibitshilik úshin Karnegi qorymen birlesip qurǵan halyqaralyq pikirtalas alańy sanalady.
Astana klýbynyń birinshi otyrysy 2015 jylǵy qarashada álemniń 15 elinen kelgen 47 sarapshynyń qatysýymen ótken edi. Onyń barysynda Eýraziia geoekonomikasynyń negizgi aspektileri, ǵalamdyq jáne óńirlik oiynshylardyń múddeleri, ekonomikalyq qaýip-qaterler men múmkindikter máseleleri talqylanǵan bolatyn. Al 2016 jyldyń 14 qarashasynda ótken ekinshi otyrysqa álemniń 50-den astam sarapshysy, saiasi jáne qoǵam qairatkerleri, 21 eldiń ǵalymdary, sonymen birge jetekshi qazaqstandyq sarapshylar qatysty.
