Sapar aiasynda Qazaqstan Prezidenti óńirdegi birqatar áleýmettik jáne ónerkásiptik nysandardy aralap kórdi. Bul týraly Aqordanyń baspasóz qyzmeti habarlaidy.
Elbasy «DaruZharygy» JShS oftalmologiia ortalyǵyna bardy, onda jańa klinikanyń emhanalyq, diagnostikalyq jáne statsionarlyq bólimshelerin, lazer ortalyǵy men ota jasaý bólimin aralap kórdi, sondai-aq kózge ota jasaýǵa arnalǵan zamanaýi meditsinalyq qural-jabdyqtarmen tanysty.
Nursultan Nazarbaev óńir turǵyndaryna shet elderge barmai-aq, eýropalyq deńgeidegi joǵary mamandandyrylǵan oftalmologiialyq kómek alýǵa múmkindik beretin mundai nysandardy iske qosýdyń mańyzdylyǵyn airyqsha atap ótti.
Meditsina qyzmetkerleri densaýlyq saqtaý salasyna únemi kóńil bólip, tiimdi áleýmettik saiasat júrgizip jatqany úshin Prezidentke alǵys bildirdi.
Sonymen qatar, Qazaqstan Prezidentine Astana qalasynda salynatyn alǵashqy meditsinalyq ońaltý ortalyǵynyń maketi tanystyryldy.
Budan keiin Memleket basshysy «Aiala» balalardy saýyqtyrý ortalyǵyna bardy.
Elbasy tserebraldi sal aýrýymen, aýtizmmen, neiro-ortopediialyq patologiiamen aýyratyn balalarǵa arnalǵan zamanaýi tehnologiialar men standarttary bar áleýmettik-psihologiialyq jáne meditsinalyq ońaltý baǵdarlamalarymen tanysty.
Sonymen qatar, Nursultan Nazarbaevqa «Baqytty bala» oblystyq jobasynyń júzege asyrylý nátijeleri jóninde málimdeldi. Joba aiasynda erekshe muqtaj balalar úshin arnaiy korrektsiialyq balabaqsha, psihologiialyq jáne meditsinalyq-pedagogikalyq konsýltatsiia beretin oryndar, «Kúnshýaq» balalardy saýyqtyrý lageri ashyldy. Aýdandardaǵy psihologiialyq-pedagogikalyq korrektsiia kabinetteri jáne Aqtóbe qalasynyń orta mektepterinde inkliýzivti bilim berý isin damytý jónindegi resýrsty kabinetter jasaqtalyp, jumys júrgizýde.
Budan ózge, Elbasy memleket-jekemenshik seriktestik aiasynda Slovakiia investorlarynyń qatysýymen salynǵan qaladaǵy jańa Muz saraiyna bardy.
Qazaqstan Prezidenti jas hokkeishilerdi jáne barsha aqtóbelikterdi Muz saraiynyń ashylýymen quttyqtap, shaibaǵa estelik qoltańba qaldyrdy.
Sonymen qatar, Elbasy memleket-jekemenshik seriktestik aiasynda salynǵan «ACE Tennis Center» sport kesheniniń jumysymen tanysyp, óńirlerde osyndai sport infraqurylymdarynyń ashylýy salaýatty ómir saltyn nasihattaýǵa jáne elimizde tennistiń damý deńgeiin arttyrýǵa múmkindik beretinin atap ótti.
Nursultan Nazarbaev jas sportshylarmen áńgimelesip, tennis dobyna estelik qoltańba qaldyrdy, sondai-aq osy ortalyqtyń qonaq úi kesheni men basqa da oryndaryn aralap kórdi.
Budan keiin Qazaqstan Prezidenti «Aqtóbe» indýstriialyq aimaǵyna bardy. Memleket basshysyna indýstriialyq aimaqta iske asyrylyp jatqan jobalar, sondai-aq ónerkásip kásiporyndaryn tsifrlandyrý jáne tehnologiialyq turǵydan jańǵyrtý, oblystyń agroónerkásip keshenin damytý úshin atqarylǵan jumystar týraly málimdeldi.
Aqtóbe oblysynyń ákimi Berdibek Saparbaev óńirdiń biylǵy toǵyz aidaǵy áleýmettik-ekonomikalyq damýynyń negizgi nátijeleri jóninde baiandady.
«Esepti kezeńde áleýmettik-ekonomikalyq damýdyń barlyq negizgi kórsetkishteri boiynsha ósý qarqyny saqtalyp otyr. Ónerkásip ósimi – 105,7%. Jalpy, qańtar-qyrkúiek ailarynda óndirilgen ónimniń quny 1,3 trln teńgeden asty. Aýyl sharýashylyǵy óniminiń jalpy kólemi 167,3 mlrd teńgeni nemese 104%-dy qurady. Osy aida 85 myń sharshy metr turǵyn úidi paidalanýǵa berý josparlanyp otyr. Bul byltyrǵy osy kezeńmen salystyrǵanda 22,1%-ǵa artyq. Biylǵy 9 ai ishinde 318 mlrd teńgeden astam investitsiia tartyldy», — dedi B. Saparbaev.
Sonymen qatar, óńir basshysy negizgi memlekettik baǵdarlamalardyń, sonyń ishinde «Bes áleýmettik bastamanyń» júzege asyrylý barysy jóninde esep berdi.
Baiandamany tyńdaǵan soń, Nursultan Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty halyqqa arnalǵan joldaýdy tiimdi iske asyrýdyń mańyzdylyǵyn atap ótip, oblystaǵy ortasha jalaqyny ósirý, jergilikti mańyzy bar joldardy jóndeý jáne óńirdiń, ásirese Aqtóbe qalasynyń ekologiialyq ahýalyn jaqsartý jóninde birqatar naqty tapsyrma berdi.
