Elbasy Resei Federatsiiasy Federaldyq jinalysy Federatsiia keńesiniń tóraǵasy Valentina Matvienkomen kezdesti, dep habarlaidy "Ult aqparat" Elbasynyń resmi saityna silteme jasap.
Kezdesýde Nursultan Nazarbaev Qazaqstan men Resei arasynda barlyq baǵyttar boiynsha yntymaqtastyqty odan ári nyǵaitýdyń mańyzdylyǵyn atap ótti.
– Resei bizdiń tatý kórshimiz ári strategiialyq seriktesimiz. Sizdiń saparyńyz parlamentaralyq bailanysty damytyp qana qoimai, memleketaralyq qarym-qatynasty da nyǵaita túseri anyq, – dedi Qazaqstannyń Tuńǵysh Prezidenti.
Valentina Matvienko Nursultan Nazarbaevty aldaǵy Elorda kúnimen jáne biyl atap ótilip jatqan Qazaqstan táýelsizdiginiń 30 jyldyǵymen quttyqtady.
– Sizdi kele jatqan Qala kúni meiramymen shyn júrekten quttyqtaimyn. Jas Qazaqstannyń jańa astanasynyń boi kóterýine Ózińiz tikelei atsalystyńyz. Biyl Qazaqstan táýelsizdiginiń otyz jyldyǵy atap ótilýde. Otyz jyl qas qaǵym sáttei óte shyqty. Búginde Qazaqstan – postkeńestik keńistiktegi eń tabysty elderdiń biri. Sizder damyǵan memlekettik institýttary men naryqtyq ekonomikasy bar egemen el qurdyńyzdar. Osy joldy júrip ótken Qazaqstan ózindik kelbeti, ishki jáne syrtqy saiasaty bar, álemdik qoǵamdastyqta qurmetke ie memleketke ainaldy, – dedi Federatsiia keńesiniń tóraǵasy.
Valentina Matvienko Elbasynyń Qazaqstan-Resei qatynastarynyń qalyptasýy men damýyndaǵy rólin erekshe atap ótti.
– Siz Resei men Qazaqstan arasynda bailanys ornatýdy árdaiym qoldap kelesiz. Óitkeni bul Qazaqstannyń strategiialyq, geosaiasi jáne ulttyq múddelerine sai. Sizdiń kúsh-jigerińizdiń arqasynda biz memleketaralyq qatynas ornatýdyń tabysty jolynan ótip, tiimdi, teń quqyly, ózara syilastyqqa negizdelgen yntymaqtastyq modelin qurdyq, – dedi Federatsiia keńesiniń tóraǵasy.
