Qazaqstan Prezidenti Nursultan Nazarbaev TMD-ǵa múshe memleketter basshylary keńesiniń shaǵyn quramda ótken otyrysyna qatysty, dep habarlaidy Aqordanyń baspasóz qyzmeti.
Keńeske Ázerbaijan Respýblikasynyń Prezidenti I.Áliev, Armeniia Respýblikasynyń Prezidenti S.Sargsian, Belarýs Respýblikasynyń Prezidenti A.Lýkashenko, Moldova Respýblikasynyń Prezidenti I.Dodon, Resei Federatsiiasynyń Prezidenti V.Pýtin, Tájikstan Respýblikasynyń Prezidenti E.Rahmon, Túrikmenstan Prezidenti G.Berdimuhamedov, Ózbekstan Respýblikasynyń Prezidenti Sh.Mirziioev, sondai-aq Qyrǵyz Respýblikasynyń Premer-Ministri S.Isakov jáne TMD-nyń Atqarýshy komitetiniń tóraǵasy - Atqarýshy hatshysy S.Lebedev qatysty.
Qazaqstan Prezidenti sóilegen sózinde TMD-ǵa múshe elderdiń arasyndaǵy saýda-ekonomikalyq qarym-qatynasty damytýda osy uiymnyń erekshe ról atqaratynyn atap ótti.
Memleket basshysy TMD-ny jańǵyrtý men ony jetildirýge qatysty birqatar ózekti baǵyttardy aitty.
Nursultan Nazarbaev TMD-ny odan ári damytý tujyrymdamasyn qaita qarap, jańa is-sharalar josparyn ázirleýdi usyndy.
Sonymen birge, Qazaqstan Prezidenti dostastyq elderi arasyndaǵy saýda-ekonomikalyq qarym-qatynastardy nyǵaitý máselelerine toqtaldy.
- TMD aýmaǵynda qyzmet kórsetýdiń erkin saýdasy biznesmenderimiz úshin zor múmkindikter týǵyzyp, elderimizdiń saýda-ekonomikalyq kooperatsiiasyn jańa deńgeige shyǵarady. Úkimetter basshylarynyń keńesi men Atqarýshy komitetke Qyzmet kórsetýdiń erkin saýdasy týraly kelisim jobasy boiynsha jumysty jandandyryp, ony jýyq arada qabyldaýdy tapsyrýdy usynamyn, - dedi Memleket basshysy.
Nursultan Nazarbaev Resei Federatsiiasynyń osy uiymǵa tóraǵalyǵynyń nátijeli bolǵanyn aityp, kelesi jyly TMD-ǵa tóraǵalyq etetin Tájikstan Respýblikasyna tabys tiledi.
