Qazaqstan Prezidenti Nursultan Nazarbaev Tatarstan Respýblikasynyń Prezidenti Rýstam Minnihanovpen kezdesti, dep habarlaidy "Ult aqparat" Aqordaǵa silteme jasap.
Kelissózder barysynda taraptar eki jaqty qatynastardyń qazirgi máseleleri jáne ózara yntymaqtastyqty damytýdyń aldaǵy josparlary jóninde áńgimelesti.
Memleket basshysy eki el arasyndaǵy bailanystardy nyǵaitýdyń perspektivti baǵyttaryna toqtalyp, Tatarstannyń áleýmettik-ekonomikalyq damýynyń qarqyny joǵary ekenin atap ótti.
Nursultan Nazarbaev Qazaqstan men Tatarstan arasynda baýyrlastyq ári senimdi qarym-qatynas ornaǵanyn aitty.
Qazaqstan Prezidenti saýda-ekonomikalyq jáne investitsiialyq yntymaqtastyqty jandandyrýdyń mańyzdylyǵyna nazar aýdardy.
– Sizderde IT-tehnologiialar salasy jaqsy damyp keledi. Bizdiń jastarymyz bul tájiribeni zertteýi kerek. Óńiraralyq yntymaqtastyq ta ilgerilep keledi. Eki jaqty saýda kólemi 700 million dollarǵa deiin ósti. Endi 1 milliard dollar kórsetkishine qol jetkizý kerek, – dedi Memleket basshysy.
Qazaqstan Prezidenti mashina jasaý, qorǵanys jáne ǵarysh ónerkásibi salalarynda birlesken kásiporyndar qurý múmkindigi jóninde aitty.
Nursultan Nazarbaev Tatarstannyń munai ónimderin qaita óńdeý salasyndaǵy tájiribesin atap ótti.
– Barlyq memleketter balamaly energiia kózderin paidalanýǵa kóshetin bolady. Biraq, taiaý 50 jyl ishinde munai men gazǵa degen suranys ta saqtala beredi. Osy ýaqyt kezeńin paidalanyp, biz óńdeý ónerkásibin qurýymyz kerek, – dedi Memleket basshysy.
Sonymen qatar, Qazaqstan Prezidenti aýyl sharýashylyǵy salasyndaǵy yntymaqtastyq máselelerine nazar aýdardy.
– Aýyl sharýashylyǵy ǵylymyn damytý qajet. Reseige et ónimderin de jetkize alamyz. Biz joǵary sapaly siyr etin óndirý úshin shet elden asyl tuqymdy iri qara maldy alyp keldik, – dedi Nursultan Nazarbaev.
Memleket basshysy Qazaqstannyń kólik-tranzit áleýetin damytýdyń jáne infraqurylymdyq baǵdarlamalardy júzege asyrýdyń nátijelerine toqtaldy.
Qazaqstan Prezidenti mádeni-gýmanitarlyq yntymaqtastyq, sonyń ishinde bilim berý men meditsina salasyndaǵy bailanystardy nyǵaitý máselelerine nazar aýdardy.
– Qazan qalasynyń tabysty damyp kele jatqanyna qýanyshtymyn. Reseimen ózara jalpy qarym-qatynasymyz turǵysynan alǵanda Tatarstan jetekshi oryndardyń birinde. Biz eki halyqtyń igiligi úshin yntymaqtastyǵymyzdy jalǵastyra beretin bolamyz, – dedi Memleket basshysy.
Nursultan Nazarbaev R.Minnihanovtyń elderimiz arasyndaǵy dostyq qatynastardy, ózara túsinistik pen senimdi nyǵaitýǵa qosqan úlesin atap ótip, Tatarstan Respýblikasynyń Prezidentin birinshi dárejeli «Dostyq» ordenimen marapattady.
Rýstam Minnihanov ekonomikanyń túrli sektorlaryndaǵy tiimdi eki jaqty yntymaqtastyqtyń mańyzdylyǵyn atap ótti.
– Búginde Qazaqstan – bizdiń basty seriktesimiz. Tabysty birlesken jobalardy júzege asyrý tájiribesi mańyzdy bolyp sanalady, – dedi Tatarstan Respýblikasynyń Prezidenti.
R.Minnihanov Qazaqstandaǵy bilim berý júiesiniń damý qarqynyn atap ótip, stýdent almasý úderisin jandandyrýǵa daiyn ekenin jetkizdi.
Tatarstan Prezidenti Astanadaǵy halyqaralyq «EKSPO-2017» kórmesin aralap kórgen kezde alǵan áseri jóninde aitty.
– «EKSPO-2017» kórmesi joǵary deńgeide ótti. Sizdiń arqańyzda qýatty ári zamanaýi alań boi kóterdi. Osy keshenniń bazasynda «Astana» halyqaralyq qarjy ortalyǵynyń ashylýy aitýly oqiǵa bolady dep oilaimyn. Keleshekte Qazaqstandaǵy áriptesterimizben birge «Astana» halyqaralyq qarjy ortalyǵy aiasynda jumys istegimiz keledi, – dedi R.Minnihanov.
