Bir eldiń nemese aimaqtyń ǵana emes, tutas adamzattyń keleshegi búgingi emtihandy qalai ótkenimizge bailanysty bolmaq. Astana Club otyrysynda QR Tuńǵysh Prezidenti Nursultan Nazarbaev osylai dedi, dep habarlaidy QazAqparat.
«Búkil Eýraziiada qaýipsizdik pen turaqtylyqsyz eshkim de uzaq merzimdi damýǵa qol jetkize almaitynyn Qazaqstan uǵyp otyr. Sol sebepti búgingi jaǵdaida qurlyqtaǵy barlyq elder tar aimaqshylyqqa, bloktyq oilamǵa berilmei, eýraziialyq aýqymdy sanatta oilanýy tiis. Tek osylai ǵana Eýraziialyq sýbqurlyq ózine tán áleýetti iske asyra alady. Dál osy rette bizdiń klýb Úlken Eýraziia atty jańa geosaiai qurylymda biryńǵai alań bolyp otyrǵany qýantady», - dedi Nursultan Nazarbaev Astana Club otyrysynda.
Elbasy áigili oishyl Arnold Toinbidiń sózin keltirdi.
«Tarihtyń syn-tegeýrinine qarsy tapqan jaýaptaryna qarai árbir qoǵam damyp, jeńip keledi. Tarih – qatal ekzamenator. Kóp el burys nemese orynsyz áreketi úshin jaýap bergen. Bir eldiń nemese aimaqtyń ǵana emes, tutas adamzattyń keleshegi búgingi synaqty qalai ótkenimizge bailanysty bolmaq. Tek kúsh biriktirý arqyly ǵana jańa qaýipter men tegeýrinderge qarsy tura alamyz», - dedi Nursultan Nazarbaev.
