QR Prezidenti Nursultan Nazarbaev Aqordada Qazaqstan halqyna kezekti Joldaýyn jariialaý barysynda indýstriialandyrýdyń basty mindetin atady, dep habarlaidy QazAqparat tilshisi.
«Indýstriialandyrýdyń basty baǵyty - eksport. Úkimet eksportqa shyǵa alatyn kásiporyndarǵa qoldaý jasaýǵa tiis. Ásirese, shikizatty óńdeý salasyna basymdyq bergen jón. Osy saladaǵy saiasatqa proaktivti sipat berý kerek. Basty maqsat - álemdik naryqtarǵa shyǵý», - deidi Elbasy.
Prezidenttiń aitýynsha, otandyq kásiporyndarǵa halyq kóp tutynatyn taýarlardy shyǵarýǵa kómektesý kerek. Sóitip, ishki naryqty óz ónimderimizge toltyrý qajet. «Mysaly, qazir osy jerde otyrǵandardyń ústindegi sheteldik kiimderdiń bárin alyp qoisa, tyr jalańash qalasyńdar. Bizde kóilekti de, kostiýmdi de shyǵara alady. Ondai kásiporyndarǵa qoldaý jasaý qajet. Óz taýarymyzdy qoldaý kerek. Ózim talai ret kórsettim ǵoi. Men tek otandyq kostiýmderdi kiip júremin. Sapasy sheteldik ónimnen esh kem emes. Al baǵasy on esege arzan. Sheteldik taýarlardy neǵurlym az tutynsaq, soǵurlym táýelsizdigimiz myqty bolady», - dep atap kórsetti Memleket basshysy.
Osy oraida Prezident óńdeý ónerkásibi men shikizatty emes eksportty qoldaýǵa qosymsha 500 mlrd teńge bólip berýdi tapsyrdy. Al Ulttyq bank ekinshi deńgeili bankterge 600 mlrd teńge bóletin bolady. Ol aqsha otandyq ónimderdi shyǵarý jobalaryna jumsalady.
Aita keteiik, QR Prezidenti Nursultan Nazarbaev osy ýaqytta Aqordada Qazaqstan halqyna Joldaýyn jariialaýda. Strategiialyq qujat elimizdiń áleýmettik-ekonomikalyq damýynyń ózekti máselelerine jáne qazaqstandyqtardyń ál-aýqatyn odan ári arttyrý mindetterine arnalǵan.
.jpeg)