Elbasy Nurcultan Nazarbaev Joǵary Eýraziialyq ekonomikalyq keńestiń qurmetti Tóraǵasy, Saýda jáne integratsiia ministri Baqyt Sultanovty qabyldady, dep habarlaidy "Ult aqparat" elbasy.kz saityna silteme jasap.
Kezdesýde Qazaqstannyń Tuńǵysh Prezidentine saýda júiesin transformatsiialaý jáne odan ári damytý jónindegi vedomstvo qyzmetiniń negizgi baǵyttary týraly aqparat berildi.
B.Sultanovtyń málimetine sáikes, Saýda jáne integratsiia ministrligi tiimdi kópformatty saýda-logistikalyq infraqurylymdy qalyptastyrý baǵytynda jumys atqaryp keledi. Onyń quramyna Ulttyq taýar ótkizý júiesi men óńirlik habtar – «Ortalyq Aziia» halyqaralyq saýda-ekonomikalyq yntymaqtastyq ortalyǵy, «Qorǵas» shekara mańy yntymaqtastyǵy halyqaralyq ortalyǵy jáne «Eýraziia» saýda-indýstriialyq ortalyǵy kiredi.
Sonymen qatar ministr Eýraziialyq ekonomikalyq odaqta saýdany júiege keltirý jáne 16 kedergini joiý boiynsha júrgizilgen jumystar týraly baiandady.
