Polsha Qazaqstan azamattary úshin de vizasyz rejim engizgendigin qalaimyz. Bul týraly búgin Aqordada Elbasy Nursultan Nazarbaev Polsha prezidenti Andjei Dýdamen keńeitilgen quramdaǵy kelissózderden keiin birlesken málimdeme jasaý barysynda aitty, dep habarlaidy QazAqparat.
«Aziiadan Eýropaǵa jáne keri baǵytta júkterdi jetkizýdi jedeldetý úshin zamanaýi kólik infraqurylymyn jasaý barysynda bir-birimizge kómek kórsetýge daiynbyz. 28 mamyrda Astana men Varshava arasynda tikelei áýe bailanysynyń ashylýy da uzaq kútken oqiǵa boldy. Biz eki el arasyndaǵy viza rejimin alyp tastadyq jáne poliak tarapynan da sony suraimyz», - dedi Elbasy Polsha prezidentine qarata.
Qazaqstan Prezidenti poliak áriptesimen ótken kelissózder barysynda bilim jáne ǵylym máselesine de basa nazar aýdarylǵandyǵyn, búginde 700-den astam qazaqstandyq Polshanyń joǵary oqý oryndarynda bilim alyp jatqanyn aitty.
«Sonymen qatar ǵylym-bilim, mádeni-gýmanitarlyq deńgeidi damytýdy qoldaimyz ári bizdiń seriktestigimizdi jandandyrýdy da esten shyǵarmaimyz. Bul rette Qazaqstanda turyp jatqan 32 myń poliak diasporasynyń róli erekshe. Olar bizdiń azamattarymyz», - dedi Nursultan Nazarbaev.
Memleket basshysy Polsha prezidenti Andjei Dýdanyń sapary qazaqstandyq-poliak qarym-qatynasyna tyń serpin berip, eki halyqtyń igiline qyzmet etetindigine senimdi ekendigin atap ótti.
