Nursultan Nazarbaev Túrikmenstan Prezidenti Gýrbangýly Berdimuhamedovpen kezdesti, dep habarlaidy "Ult aqparat" Aqordaǵa silteme jasap.
Memleket basshysy Túrikmenstan Prezidentimen júzdesip, búgingi otyrystyń mańyzdylyǵyn atap ótti.
Nursultan Nazarbaev joǵary deńgeidegi turaqty kezdesýler eki taraptyń da strategiialyq seriktestikti odan ári nyǵaitýǵa múddeli ekendiginiń aiqyn kórinisi sanalatynyn aitty.
– Memleketterimiz arqyly ótetin Ámýdariia men Syrdariia ózenderi basseinderiniń máselelerin talqylaimyz. Bul eki ózen bizdiń balalarymyz ben nemerelerimizge ómir syilaidy. Osy problemalardy birlese talqylaýdyń mańyzy zor, – dedi Nursultan Nazarbaev.
Memleket basshysy sammittiń Túrikmenstanda der kezinde ótkizilip otyrǵanyna toqtalyp, Halyqaralyq Araldy qutqarý qorynyń buǵan deiingi sammiti 2009 jyly ótkenin atap ótti.
– Men baýyrlas Túrikmenstannyń damý barysyn jiti qadaǵalap otyramyn. Túrikmen halqyna bar jaqsylyqty tileimin, – dep túiindedi Qazaqstan Prezidenti.
Gýrbangýly Berdimuhamedov Nursultan Nazarbaevqa iltipat bildirip, Halyqaralyq Araldy qutqarý qorynyń quryltaishy memleketteri basshylarynyń otyrysyna shaqyrýyn qabyl alǵany úshin alǵys aitty.
– Qurmetti Nursultan Ábishuly, baýyrlas elderimizdi biriktiretin Kaspii teńiziniń jaǵasyna – Túrikmenstanǵa qosh keldińiz! – dedi Túrikmenstan Prezidenti.
Túrikmenstan basshysy Qazaqstan Prezidentin Besinshi Kaspii sammitiniń tabysty ótýimen jáne tarihi qujat – Kaspii teńizine qatysty konventsiiaǵa qol qoiylýymen quttyqtady.
Eki el kóshbasshylary Jol kartasyn iske asyrý, kólik-tranzit salasyndaǵy yntymaqtastyqty damytý, sondai-aq óńirlik qaýipsizdik máselelerin qarastyrdy.
Sońynda Gýrbangýly Berdimuhamedov Nursultan Nazarbaevty jáne barsha Qazaqstan halqyn Qurban ait merekesimen quttyqtady.
