Memleket basshysy Ózbekstannyń Olii Májilisi zań shyǵarý palatasynyń spikeri Nýrdinjon Ismoilovpen kezdesti, dep habarlaidy "Ult aqparat" Aqordanyń baspasóz qyzmetine silteme jasap.
Nursultan Nazarbaev Qazaqstan men Ózbekstan arasyndaǵy eki jaqty qarym-qatynastardyń oń qarqynmen damyp kele jatqanyn erekshe atap ótti.
- Búginde ózara qarym-qatynastarymyz joǵary deńgeide. Biz Shavkat Mirziioevpen jylyna birneshe ret kezdesip, ekonomikalyq jáne saiasi yntymaqtastyq salasyndaǵy ózekti máselelerdiń bárin talqylap kelemiz. Qabyldanǵan qujattar men qol jetkizilgen ýaǵdalastyqtardy júzege asyrý isinde eki memlekettiń parlamentteri mańyzdy ról atqarady, - dedi Qazaqstan Prezidenti.
Nýrdinjon Ismoilov Ózbekstan Respýblikasynyń Prezidenti Shavkat Mirziioevtiń sálemin jetkizip, eki el parlamentteri arasynda ótken kelissózderdiń nátijeleri jóninde aitty.
- Shyn máninde, sońǵy ýaqytta Ózbekstan men Qazaqstan arasyndaǵy yntymaqtastyq joǵary deńgeige jetti. Buǵan, eń aldymen, Ózbekstan men Qazaqstan bailanysynyń jańa kezeńine jol ashqan eki memlekettiń prezidentteri arasyndaǵy dostyq qarym-qatynastardyń arqasynda qol jetkizildi. Sizder halyqtarymyzdyń yntymaq pen kelisim aiasynda birlese ómir súrsek degen oi-nietin júzege asyrdyńyzdar. Sol úshin Sizderge zor alǵys aitamyz, - dedi Ózbekstannyń Olii Májilisi zań shyǵarý palatasynyń spikeri.
