Nursultan Nazarbaev «Nasdaq» kompaniiasynyń prezidenti Adina Fridmanmen kezdesti, dep habarlaidy "Ult aqparat" Aqordanyń baspasóz qyzmetine silteme jasap.
Kezdesý barysynda Memleket basshysy kompaniianyń Qazaqstanda jumys júrgizý jónindegi sheshimin quptaitynyn aitty.
«Sizderdiń Qazaqstanda, «Astana» halyqaralyq qarjy ortalyǵynda jumys isteý jónindegi sheshimderińizdi qoldaimyz. Biz Konstitýtsiiaǵa jáne elimizdiń birqatar zańyna ózgerister engizdik. Onda aǵylshyn quqyǵy engizilgen jáne qatysýshylardyń barlyǵyna jeńildikter qarastyrylǵan. Jumys isteitinder úshin barlyq qolaily jaǵdaidy jasaimyz», - dedi Qazaqstan Prezidenti.
Nursultan Nazarbaev «Nasdaq» kompaniiasynyń bul sheshimi onyń seriktesteri men basqa da sheteldik kompaniialardy «Astana» halyqaralyq qarjy ortalyǵymen yntymaqtastyqty damytýǵa jeteleitinin atap ótti.
A.Fridman Qazaqstannyń halyqaralyq qarjy ortalyǵyn qurý jolynda atqarǵan jumystarynan alǵan áseri jóninde aitty.
«Biz «Astana» halyqaralyq qarjy ortalyǵyn damytý jónindegi josparlarǵa óte tánti boldyq. Qarjy ortalyǵynyń jumysyna qatysty barlyq máseleniń jan-jaqty qarastyrylǵanyn atap ótkimiz keledi. Bul jumystyń tyńǵylyqty atqarylǵanyna rizamyz», - dedi «Nasdaq» kompaniiasynyń basshysy.
Sonymen qatar, A.Fridman «Astana» halyqaralyq qarjy ortalyǵymen yntymaqtastastyqty bastaýǵa jáne Qazaqstan birjasynyń jumysyna qajetti ozyq tehnologiialarmen qamtamasyz etýge ázir ekenin aitty.
Kelissóz barysynda taraptar birlese jumys isteýdiń jáne Qazaqstanda qolaily investitsiialyq ahýal qalyptastyrý úshin uzaq merzimdi bailanystardy ornatýdyń mańyzdylyǵyn atap ótti.
Sońynda Memleket basshysy Nursultan Nazarbaev A.Fridmandy biylǵy shilde aiynda bolatyn «Astana» halyqaralyq qarjy ortalyǵynyń resmi túrde ashylý rásimine qatysýǵa shaqyrdy.
Sondai-aq, Memleket basshysy «Goldman Sachs» kompaniiasynyń prezidenti Harvi Shvartspen júzdesti.
Kezdesýde taraptar «Astana» halyqaralyq qarjy ortalyǵy men «Goldman Sachs» kompaniiasynyń odan ári yntymaqtasý máselelerin talqylady.
Nursultan Nazarbaev halyqaralyq qarjy ortalyǵyn qurý úshin atqarylǵan jumystardyń nátijelerine toqtaldy.
«Búginde barlyq quqyqtyq jaǵdai jasaldy. Aǵylshyn quqyǵy bazasyndaǵy sot quryldy. Qatysýshylar úshin qajetti barlyq jeńildikter qarastyryldy, sonyń ishinde viza jáne salyq jeńildikteri de bar», - dedi Qazaqstan Prezidenti.
Sonymen birge, Qazaqstan Prezidenti «ExxonMobil» kompaniiasynyń bas atqarýshy direktory Darren Výdspen kezdesti.
Memleket basshysy Qazaqstan men «ExxonMobil» kompaniiasy arasynda munai-gaz salasynda qalyptasqan ekonomikalyq seriktestikti airyqsha atap ótti.
Qazaqstan Prezidenti bul kompaniianyń Teńiz jáne Qashaǵan munai-gaz ken oryndaryn igerýge arnalǵan jobalarǵa atsalysyp otyrǵanyn aitty.
D.Výds Nursultan Nazarbaevty Qazaqstannyń BUU Qaýipsizdik Keńesindegi tóraǵalyǵynyń bastalýymen jáne AQSh Prezidenti D.Tramppen ótken kelissózderdiń tabysty bolýymen quttyqtady.
