Qazaqstan Prezidenti Nursultan Nazarbaev Ujymdyq qaýipsizdik shart uiymyna Qazaqstannyń tóraǵalyǵy kezinde atqarylǵan jumystarǵa jan-jaqty toqtaldy, habarlaidy QazAqparat tilshisi.
«Qazaqstan UQShU-ny bedeldi ári tiimdi qurylym retinde qarastyrady. Uiymǵa múshe memleketterdiń belsendi jan-jaqty qoldaýymen aǵymdaǵy jyly Qazaqstan óziniń tóraǵalyǵy kezindegi basymdyqtaryn tabysty júzege asyrdy. Qysqasha qorytyndysyn shyǵara ketsem. Birinshiden, biz áskeri salada UQShU-nyń birikken shtabyn reformalaýdy josparly túrde aiaqtadyq. Bizdiń qaýipsizdigimizge áleýetti qaterlerdi anyqtaý boiynsha múmkinshilikti keńeitýge arnalǵan UQShU-nyń tolyqqandy daǵdarystyq áreket etý qyzmetin daiyndaý aiaqtalyp keledi. Qyrǵyzstan aýmaǵynda «Jaýynger baýyrlastar-2018» oqý-jattyǵýy Shuǵyl áreket etý ujymdyq kúshteriniń bólimshelerin jáne UQShU bitimgershilik batolonyn tartý arqyly ótkizildi», - dep atap ótti Memleket basshysy UQShU Ujymdyq qaýipsizdik keńesi sessiiasynyń keńeitilgen otyrysynda.
Ekinshiden, QR Prezidentiniń aitýynsha, Almatyda ótken Áskeri-tehnikalyq yntymaqtastyq jónindegi UQShU memlekataralyq komissiiasynyń otyrysynda qarý-jaraqtar men áskeri tehnikalardy standarttaý jónindegi úilestirý keńesi quryldy. Atalǵan keńestiń tóraǵasy qyzmetine Resei Úkimeti tóraǵasynyń orynbasary Iýrii Borisov taǵaiyndaldy.
«Osyǵan bailanysty biz elderimizdiń qorǵanys kásiporyndarynyń óndiristik kooperatsiiasy jandana túsedi dep úmittenemiz», - dedi Nursultan Nazarbaev.
Úshinshiden, Elbasy BUU Bas assambleiasynyń 73 sessiiasy aiasynda Qazaqstannyń terrorizmnen azat beibitshilikke qol jetkizý jónindegi ámbebap kodeks qabyldaý týraly bastamasy júzege asyrylǵanyn aitty. Búginde atalǵan kodekske álemniń 70-ten astam eli qosylyp otyr.
«Osy múmkinshilikti paidalana otyryp bizdiń bastamamyzǵa qoldaý bildirgen UQShU múshelerine rizashylyǵymdy bildirgim keledi», - dep atap ótti Nursultan Nazarbaev.
Tórtinshiden, QR Prezidenti zamanaýi kiberqaterge qarsy is-qimyl salasyndaǵy birlesken jumystyń óz jalǵasyn taýyp otyrǵanyn aitty.
«Aǵymdaǵy jyly Astanada kompiýterlik intsidentterge shuǵyl áreket etý tiimdiligin, úilesimdiligin arttyrý úshin aqparattyq ózara is-qimyl reglamenti qabyldandy», - dedi Elbasy.
Besinshiden, Memleket basshysy esirtkiniń zańsyz ainalymymen kúres máselesi de UQShU-nyń tyńǵylyqty nazarynda bolǵanyn atap ótti. Ótken kezeń ishinde «Arna» atty eki operatsiiasynyń júrgizilgenin eske saldy.
«Buǵan qosa, onyń aiasynda Qazaqstannyń ońtústiginde «Qyzyl barhan» arnasy» halyqaralyq esirtkige qarsy operatsiia júrgizildi», - dedi Nursultan Nazarbaev.
Buǵan deiin elordada Ujymdyq qaýipsizdik shart uiymy Ujymdyq qaýipsizdik keńesiniń sessiiasy bastalǵanyn habarlaǵan edik.
