Memleket basshysy Nursultan Nazarbaev latyn álipbiin engizý boiynsha sózden iske kóshetin ýaqyt jetkenin aita kele, kezinde ana tilin umytyp qalǵan kezin eske aldy, dep habarlaidy "Ult aqparat".
"Nege, qalai degen suraqtardy qoiyp, barlyǵymyz latyndy engizýge kirisýimiz kerek. Kelistik qoi, konsensýs bar, halyqtyń kópshiligi toqsan bes paiyzynan kóbi qoldap otyr", — dedi Elbasy jyl qorytyndysy boiynsha otandyq buqaralyq aqparat quraldarynyń ókilderimen ótken kezdesýde.
Memleket basshysynyń aitýynsha, halyqty birtindep latyn álipbiine úirete berý kerek.
"Qazaq tildi basylymdar bir-bir baǵanadan jaza berińizder, el oqi bersin. Men ózim kabinette otyryp, Abaidyń sózderin jazamyn. Ia degende ońai emes, biraq onsha qiyn da emes. Eptep úirete berý kerek. Kósheniń, dalanyń ataýlaryn birtindep latyn álipbiine kóshiremiz. El oqyp, tili jattyǵady", — dedi prezident.
Osy jerde Nursultan Nazarbaev kezinde óziniń qazaq tilin umytyp qalǵan kezin eske aldy.
"Ózderińiz bilesizder, on jeti jasymda qazaq mektebin bitirip, Ýkrainaǵa, keiin Temirtaýdaǵy metallýrgiia kombinatyna bardym. Osylaisha jiyrma jyl tolyqqandy orys tildi ortada bolyp, tildi umytyp qaldym. Sodan Qaraǵandydan Almatyǵa ortalyq komitettiń hatshysy bolyp keldim. Maǵan qazaq tilinde sóileý kerek. Ol kezde "Sotsialistik Qazaqstan" degen gazet boldy ǵoi, sony oqi ber dedi. Qiyn boldy, biraq oqyp-oqyp, tilim óz ornyna keldi", — dedi memleket basshysy.
