Búgin Qazaqstan Prezidenti Nursultan Nazarbaev resmi saparmen Finliandiiaǵa keldi, dep habarlaidy QazAqparat tilshisi Helsinkiden.
Buǵan deiin habarlaǵanymyzdai, sapar aiasynda Nursultan Nazarbaevtyń Finliandiia Respýblikasynyń Prezidenti Saýli Niinistiomen shaǵyn jáne keńeitilgen quramdaǵy kezdesýi, sondai-aq Finliandiianyń isker toptar ókilderiniń forýmyna qatysýy josparlanyp otyr.
Aita keteiik, Memleket basshysy buǵan deiin 2009 jyldyń naýryzynda Finliandiiaǵa memlekettik sapar jasaǵan bolatyn. Munan bólek Elbasy fin basshysymen Peterbor halyqaralyq forýmy, BUU Bas Assamleiasynyń 66-sessiiasy jáne Seýl, Gaaga, Vashingtonda ótken Iadrolyq qaýipsizdik jónindegi sammitter alańynda kezdesken edi. Finliandiia prezidentteri Qazaqstanda bes márte boldy. Sońǵy ret atalǵan eldiń qazirgi Prezidenti S.Niinistio 2017 jyldyń maýsymynda elordaǵa jumys saparymen kelip, «EKSPO-2017» kórmesindegi Finliandiianyń Ulttyq kúni sharasyna qatysqan edi.
Qazaqstan men Finliandiia arasyndaǵy syrtqy taýar ainalymy ótken jyly 307,9 mln dollardy qurap, bir jyl burynǵy kórsetkishten 9,9 paiyz ósim kórsetken edi. Al osy jyldyń qańtar-shilde arasyndaǵy taýar ainalymy 160 mln dollardy qurady. Sońǵy 13 jylda Finliandiia Qazaqstanǵa 334 mln dollar tikelei investitsiia saldy. Búginde elimizde fin kapitalynyń qatysýmen elýden astam kásiporyn jumys istep tur. Qazaqstan-fin saýda-ekonomikalyq yntymaqtastyǵy himiia, jeńil ónerkásip, taý-ken metallýrgiia kesheni, mashina jasaý, qurylys materialdary, joǵary tehnologiialy boiaýlar syndy salalarda jolǵa qoiylǵan.
