Nursultan Nazarbaev elshilerden senim gramotalaryn qabyldady, dep habarlaidy "Ult aqparat" Aqordaǵa silteme jasap.
Memleket basshysyna Tájikstan Respýblikasynyń Tótenshe jáne ókiletti elshisi Hairýllo Ibodzoda, Japoniianyń Tótenshe jáne ókiletti elshisi Tatsýhiko Kasai, Cheh Respýblikasynyń Tótenshe jáne ókiletti elshisi Rýdolf Gikl, Horvatiia Respýblikasynyń Tótenshe jáne ókiletti elshisi Refik Shabanovich jáne Vetnam Sotsialistik Respýblikasynyń Tótenshe jáne ókiletti elshisi Ngýen Thi Hong Oan senim gramotalaryn tapsyrdy.
Nursultan Nazarbaev elshilerdi Qazaqstandaǵy diplomatiialyq missiialarynyń resmi túrde bastalýymen quttyqtap, olardyń qyzmeti elimizdegi mańyzdy reformalardyń júzege asyrylý kezeńimen tuspa-tus kelip otyrǵanyn atap ótti.
– Bizdiń maqsatymyz – álemdegi ozyq damyǵan 30 eldiń qataryna qosylý. Qazaqstannyń keleshegi zamanaýi tehnologiiany jete meńgergen óskeleń urpaqtyń qolynda. Sondyqtan, osy jyldy «Jastar jyly» dep jariialadym, – dedi Qazaqstan Prezidenti.
Memleket basshysy jastardy sapaly bilimmen, jumyspen jáne baspanamen qamtamasyz etý úshin tiisti sharalar qabyldanyp jatqanyn atap ótti.
Nursultan Nazarbaev biznes ahýalyn jaqsartý, shetelden investitsiia tartý jáne Qazaqstan eksportynyń baǵyttaryn keńeitý úshin birqatar baǵdarlamanyń júzege asyrylyp jatqany jóninde aitty.
Qazaqstan Prezidenti halyqaralyq kún tártibinde turǵan zamanaýi syn-qaterlerge de toqtaldy.
– Jetekshi iadrolyq derjavalar arasyndaǵy teketires álem jurtshylyǵyn alańdatyp otyr. Osy oraida, Orta jáne kishi qashyqtyqtaǵy zymyrandardy joiý týraly sharttyń buzylý qaýpin erekshe atap ótkim keledi. Beibitshilikti qalaityn elder jahandyq jańa apattyń bolýyna jol bermei, onyń aldyn alýy qajet, – dedi Memleket basshysy.
Nursultan Nazarbaev Qazaqstannyń bitimgershilik qyzmetiniń nátijelerin erekshe atap ótip, álemde iadrolyq qarýdy taratpaý úshin qabyldanǵan sharalardyń mańyzdylyǵyna nazar aýdardy.
Qazaqstan Prezidenti elshilerge arnalǵan sózinde memleketaralyq dostyq qatynastardy nyǵaitý jáne ilgeriletý qajettigin aitty.
– Biz Tájikstanmen dástúrli yntymaqtastyq pen strategiialyq seriktestikti damytýǵa zor mán beremiz. Astana men Dýshanbe arasyndaǵy TMD, Ujymdyq qaýipsizdik shart uiymy, Shanhai yntymaqtastyq uiymy jáne basqa da halyqaralyq qurylymdar aiasyndaǵy yntymaqtastyqty qarqyndy nyǵaitýdamyz. Osy rette, Tájikstannyń Aziiadaǵy ózara yqpaldastyq pen senim sharalary keńesindegi tóraǵalyǵyna tabys tilei otyryp, atalǵan baǵytta birge jumys isteýge daiyn ekenimizdi aitqym keledi, – dedi Memleket basshysy.
Nursultan Nazarbaev Qazaqstan men Japoniia arasyndaǵy qatynastardyń nátijelerine jáne ony damytý perspektivalaryna toqtaldy.
– Byltyr Briýsselde ótken ASEM sammitinde Premer-Ministr Sindzo Abemen júzdesip, eki memleket arasyndaǵy qatynastardy odan ári nyǵaitýǵa ýaǵdalastyq. 2018 jyly ózara saýda ainalymy 30 protsentke ósti. Biz japon kompaniialarynyń Qazaqstan naryǵyna atsalysýyna múddelimiz jáne qajetti jaǵdai jasaýǵa daiynbyz, – dedi Qazaqstan Prezidenti.
Memleket basshysy Chehiia Prezidenti Milosh Zemannyń «EKSPO-2017» kórmesine kelýi eki jaqty bailanystyń damýyna tyń serpin bergenin atap ótti.
– Ózara tiimdi ekonomikalyq bailanystar ornatý eki el úshin de mańyzdy. Úkimetaralyq komissiianyń áleýetin paidalanýymyz qajet dep oilaimyn, – dedi Qazaqstan Prezidenti.
Memleket basshysy Qazaqstan men Horvatiia arasyndaǵy yntymaqtastyqtyń nátijelerine de toqtaldy.
– Sońǵy jyldary Horvatiia Respýblikasymen bailanystarymyz aitarlyqtai nyǵaia tústi. Men osy eldiń prezidentterimen árdaiym jaqsy qarym-qatynasta boldym. Byltyr Astanada alǵash ret Horvatiia elshiligi ashyldy, – dedi Memleket basshysy.
Rásim barysynda Nursultan Nazarbaev Qazaqstan men Vetnam arasyndaǵy qatynastardyń tiimdiligin atap ótti.
– Búginde Vetnam – Qazaqstannyń Ońtústik-Shyǵys Aziiadaǵy negizgi áriptesteriniń biri. Biz ekonomikalyq jáne saiasi qatynastarymyzdy joǵary deńgeide damytý jónindegi jumystardy odan ári jalǵastyra berýge niettimiz, – dedi Nursultan Nazarbaev.
Sońynda Qazaqstan Prezidenti elshilerdi jaýapty missiialarynyń bastalýymen taǵy da quttyqtap, diplomatiialyq qyzmetterine tabys tiledi.
