QR Prezidenti Nursultan Nazarbaev elordanyń jańa nysandarymen tanysý barysynda Astana qalasynyń sol jaǵalaýynda ornalasqan Botanikalyq baqqa bardy, dep habarlaidy "Ult aqparat" Aqordanyń baspasóz qyzmetine silteme jasap.
Qazaqstan Prezidenti «Jasyl el» jastar eńbek jasaǵynyń ókilderimen áńgimelesip, bas qalany jáne búkil Qazaqstandy kógaldandyrý úshin júrgizilgen jumystardyń mańyzdylyǵyn atap ótti.
Nursultan Nazarbaev Botanikalyq baqtyń ortasynda ornalasqan oranjereiany aralap kórip, ony otandyq jáne halyqaralyq mamandandyrylǵan institýttardyń ǵylymi áleýetin paidalana otyryp ári qarai damytý qajettigin aitty.
Tanystyrylym rásimi kezinde Memleket basshysy elordanyń kóshirilý tarihy men jańa astanany salýdyń negizgi kezeńderi jóninde aitty.
«Astana tóńireginde orman óspeidi dep únemi aitylatyn. Biraq, búginde mundaǵy 83 myń gektar jerge otyrǵyzylǵan aǵashtardyń biiktigi 20-25 metrge deiin jetti. Jyl saiyn orman alqabynyń aýmaǵy bes myń gektarǵa ulǵaiyp keledi. Osy ormandy «Shortandy-Býrabai saiajai aimaǵymen» qosqymyz keledi», - dedi Qazaqstan Prezidenti.
Sondai-aq, Qazaqstan Prezidentine Botanikalyq baqtyń sánin keltirgen, jaryq shashqan mýzykaly sýburqaq kórsetildi. Ony «Óńirlerdiń Astanaǵa tartýy» jobasy aiasynda Shyǵys Qazaqstan oblysy saldy.
Aita keterligi, baq aýmaǵynda velosiped joly, júgirýge arnalǵan jolaq, sporttyq jabyndy, jaiaý júrginshilerge arnalǵan kópir jáne jasandy sý qoimasy bar. Kógaldandyrý aýmaǵynyń jalpy kólemi 613 myń sharshy metrden asady. Munda Eýropa, Aziia jáne Soltústik Amerika elderinen ákelingen alýan túrli butaly ósimdikter men aǵashtar bar.
.jpeg)