Qazaqstan Prezidenti Nursultan Nazarbaev dombyra men qazaq ánderi týraly aitty, dep habarlaidy QazAqparat.
«Dombyra qazaqtyń jan dúniesimen bailanysty. Kúidi, dombyranyń áýenin, sazyn murnyna jýsan iisi barǵan ári Uly dala tósinde ómirge kelgen qazaq qana túsine alady. Sebebi bul erekshe mýzyka adamnyń jan dúniesin kórsetedi, iaǵni muńdy nemese qýanyshty, oidy ashyq baiqatady. Keshkilik dombyrany shertip otyrǵan kezde, barlyǵy umytylady. Maǵan bul áser unaidy, sondai-aq dombyrada jaqsy oinaityn adamdarǵa qurmetpen qaraimyn. Bizdiń qazaqtyń óleńderi men jyrlary adamnyń jan-sezimin tolqytady, olarda filosofiialyq mazmun bar. Qazaq ánderi men jyrlarynda mýzykaǵa emes, ondaǵy sózderge mán berý kerek. Bul sózderdiń máni óte tereńde jatyr jáne olardyń úlken mańyzy bar», - dedi Memleket basshysy Aqordanyń Feisbýktegi paraqshasynda jariialanǵan beinerolikte.
Aita ketsek, Memleket basshysy Nursultan Nazarbaevtyń Jarlyǵymen shildeniń birinshi jeksenbisi Ulttyq dombyra kúni bolyp belgilengen bolatyn.
.jpeg)