Qazaqstan Prezidenti Nursultan Nazarbaev Sochi Olimpiadasynyń júldegeri, Qazaqstannyń eńbek sińirgen sportshysy Denis Tenniń qaiǵyly qazaǵa ushyraýyna bailanysty onyń otbasyna kóńil aitý jedelhatyn joldady, dep habarlaidy "Ult aqparat".
Memleket basshysynyń jedelhatyn áigili sportshyny aqtyq saparǵa shyǵaryp salý rásiminde QR Mádeniet jáne sport ministri Arystanbek Muhamediuly oqyp berdi.
«Qazaqstandyq tanymal sportshy, 2014 jyly Sochide ótken Olimpiadanyń qola júldegeri, Denis Iýrevich Tenniń qazasyn qabyrǵamyz qaiysa qabyl aldyq. Men Sizderdiń qaiǵylaryńyzǵa ortaqpyn. Bul orny tolmas ókinish, árine. Denis qazaqstandyq mánerlep syrǵanaý mektebiniń qalyptasyp, damýyna, qazaqstandyq sportty álemdik deńgeige shyǵarýǵa ólsheýsiz úles qosqan azamat. Onyń úlken jetistikteri elimizdi álemge tanytyp, jastardyń sportqa degen ynta-yqylasyn arttyrdy. Denis - tanymal sportshy, álem halqy moiyndap, qadir tutqan daryn iesi ǵana emes, eshkimge uqsamaityn erkshe tulǵa, Qazaqstannyń patrioty bolatyn. Denis Iýrevichtiń beinesi bizdiń jadymyzda máńgi saqtalady», - delingen jedelhatta.
Aita keteiik, búgin Almaty men Astana halyq Denis Tendi aqtyq saparǵa shyǵaryp saldy. Qylmysker pyshaǵynan ajal qushqan ónerli jigitpen qoshtasýǵa Almaty men Astanadaǵy qaraly jiyndarǵa myńdaǵan adam jinaldy.
Denis Tenmen qoshtasý rásimi ótken Almatydaǵy Balýan Sholaq atyndaǵy sport saraiy men Astanadaǵy "Barys-Arena" sport keshenine senbi kúni kelgen adamdardyń qarasy kóp boldy. Jinalǵandardyń arasynda Qazaqstannyń sport, mádeniet jáne óner qairatkerleri, marqumnyń dos-jarandary, resmi tulǵalar, BAQ ókilderi men qarapaiym adamdar bar.
Eske sala ketsek, Qazaqstandyq mánerlep syrǵanaýshy Denis Ten 19 shilde kúni pyshaq jaraqatynan qaza bolǵan edi. Oqiǵa Qurmanǵazy Baiseiitova kósheleriniń qiylysynda 19 shildede túski saǵat 15:00 shamasynda bolǵan. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsinov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy.
