Qazaqstan Respýblikasynyń Prezidenti Nursultan Nazarbaev Birikken Ulttar Uiymy Qaýipsizdik Keńesiniń otyrysyn ashty, dep habarlaidy "Ult aqparat" Baq.kz agenttigine silteme jasap.
«Búgingi otyrysta talqylanatyn negizgi máseleler – adamzatty jappai joiý qarýlaryn taratpaý jáne senimdilik. Delegatsiia basshylary men keńes músheleriniń ózge usynystary bolmasa, kún tártibiniń basty taqyryby retinde osy máselelerdi alamyz. (…) Osy zalda otyrǵan memleket ókilderi, Qaýipsizdik Keńestiń músheleri jáne ózge qonaqtardy tanystyrýǵa ruqsat etińizder. Búgingi sharaǵa atsalysyp otyrǵan BUU bas hatshysy Antonio Gýterresh myrzaǵa alǵysymdy bildiremin», – dep Nursultan Nazarbaev otyrysty ashty.
Qazaqstan Prezidenti, munymen qatar, Polsha Prezidenti Andjei Dýdýdy BUU Qaýipsizdik Keńesine turaqsyz múshe bolýymen quttyqtady.
«Munymen qatar, biyl Qaýipsizdik Keńesine turaqsyz múshe bolǵan Kot-d’Ivýar, Kýveit, Niderlandy, Ekvatorlyq Gvineia memleketterin quttyqtaimyn. Atalǵan alyp uiym sheńberinde seriktestik pen yntymaqtastyq ornatamyz degen niettemin», – deidi Elbasy.
Budan ózge otyrystyń ashylýynda BUU Qaýipsizdik Keńesiniń bas hatshysy Antonio Gýterresh sóz sóiledi.
«Ýaqtyly ótip jatqan qabyldaýlarǵa qosylý men úshin úlken mártebe jáne búgin ózekti máseleni kótergen Qazaqstan Respýblikasyna alǵysym sheksiz. Qazaqstanda maqtanýǵa turarlyq dástúr qalyptasyp kele jatyr. Atalǵan memleket jappai joiý qarýlarynan bas tartqan beibit álemdi qurmaq. Ómirimiz úshin asa mańyzdy máselede belsendilik tanytyp otyrǵan Qazaqstan Prezidentine de rahmet», – dedi Gýterresh.
Qaýipsizdik Keńesiniń jumystaryna Syrtqy ister ministri Qairat Ábdirahmanov pen senator Dariǵa Nazarbaev da qatysty. Keńestiń otyrysyn dál qazir tómendegi video arqyly onlain kóre alasyz.
Esterińizge sala ketsek, Qazaqstan Prezidentiniń biylǵy 16-18 qańtarda Amerika Qurama Shtattaryna resmi saparmen baratyny týraly habarlaǵan bolatynbyz. Onda Nursultan Nazarbaev AQSh prezidenti Donald Tramppen, sondai-aq AQSh-tyń resmi jáne isker toptar ókilderimen kezdesý ótkizedi dep josparlandy. Qazaqstan Respýblikasy Prezidentiniń baspasóz qyzmeti Nursultan Nazarbaevtyń AQSh-qa barǵan sátinen video jariialady. Elbasyn Donald Tramptyń ózi qarsy alyp, muny úlken mártebege balady.
Aq úide ótken kezdesýde Nazarbaev Qazaqstan men AQSh arasynda árdaiym ekijaqty saiasi qarym-qatynas ornaǵanyn aityp ótti. Budan keiin Memleket basshysy AQSh-tyń isker toptar ókilderi, AQSh-tyń energetika ministri jáne «Sheteldik jeke investitsiialar jónindegi Korporatsiia» memlekettik agenttiginiń prezidentimen kezdesti. Sapar sońynda Nazarbaev Tramppen júrgizgen kelissózdiń qorytyndysy boiynsha BAQ úshin brifing ótkizdi.
