Aqordada Resei, Ózbekstan, Italiia, Túrikmenstan elshileri Elbasy Nursultan Nazarbaevqa senim gramotalaryn tapsyrdy, dep habarlaidy Baq.kz tilshisi.
Senim gramotalaryn Memleket basshysyna Qazaqstandaǵy Resei Federatsiiasynyń tótenshe jáne ókiletti elshisi Aleksei Borodavkin, Túrikmenstan elshisi Toily Komekov, Ózbekstan elshisi Saidikram Niiazhodjaev, Italiia Elshisi Paskýale D`Avino tabystady.
Aldymen Elbasy qyzmetterin jańadan bastaǵan elshilerge sáttilik tiledi.
«Barshańyzdy Qazaqstandaǵy jańa diplomatiialyq missiialaryńyzdyń resmi bastalýymen shyn júregimmen quttyqtaimyn. Jaýapty ári mártebeli mindetterińiz elderimiz arasyndaǵy yntymaqtastyqty odan ary nyǵaitýǵa serpin beredi dep senemin. Sizderdiń diplomatiialyq qyzmetterińiz mazmundy ári mańyzdy oqiǵalarǵa toly kezeńderde bolǵaly tur», - dedi Elbasy.
Osy oraida ol elimizdiń 25 jylda damýdyń dańǵyl jolyna túskenin atap ótip, memleketimiz syrtqy saiasatqa da basa mán beretinin jetkizdi.
«Qazaqstan shirek ǵasyr ishinde diplomatiialyq júiesi ornyqqan, azamattyq qoǵamy kemeldengen, ekonomikasy damyǵan memleketke ainaldy. Qolǵa alǵan igi bastamalardyń túpki maqsaty – álemdegi ozyq damyǵan 30 eldiń qatarynda bolý. Qazaqstan halyqaralyq bailanystardy damyta túsý úshin kópjaqty syrtqy saiasi baǵytyn jalǵastyra beretin bolady. Biz beibitshilik pen qaýipsizdikti, halyqaralyq quqyq negizderin nyǵaitýdy kózdeitin is-áreketterdi qoldaimyz», - dedi Prezident.
Sonymen qatar, Nazarbaev Qazaqstannyń álemdegi máselelerdi sheshýge óz úlesin qosyp jatqanyn jetkizdi.
«Buǵan Qazaqstannyń BUU Qaýipsizdik keńesiniń turaqty emes múshesi retinde atqaryp kele jatqan jumystarynyń nátijesi dálel. Qazaqstan halyqaralyq kún tártibindegi ózekti máselelerdi, shielenisterdi sheshýge óz úlesin qosyp kele jatqanyn barshalaryńyz bilesizder. Solardyń biri – Siriiadaǵy ahýaldy beibit jolmen retteý máselesi. Bul shielenisti tarqatý isinde Astana protsesi mańyzdy rólge ie bolyp, aitýly sharalardyń birine ainaldy. Qazaqstan EAEO, ShYU, TMD jáne UQShU arnalarynyndaǵy is-qimylǵa erekshe mán beretindigin bilesizder. Elimizdiń syrtqy saiasatyndaǵy óńirlik yntymaqtastyqty nyǵaitý máseleleriniń máni zor», - dedi Elbasy saltanatty jiynda.
Sondai-aq, Elbasy elshilerge Qazaqstan ótken jyly jaqsy ekonomikalyq kórsetkishterge qol jetkizgenin habarlady.
«Elimizdiń syrtqy saiasatyndaǵy óńirlik yntymaqtastyqty nyǵaitý máseleleriniń máni zor. 2017 jyldyń qorytyndysy boiynsha Qazaqstan jaqsy ekonomikalyq kórsetkishterge qol jetkizdi. Ekonomikalyq jáne investitsiialyq yqpaldastyqty nyǵaitý, sheteldik áriptestermen yntymaqtastyq negizgi baǵyttardyń biri. Biz saýda-sattyq kólemin ulǵaityp, óndiristi órkendetý úshin tiimdi investitsiia ákelýge múddelimiz. 2017 jyly Qazaqstan biznes júrgizý jeńildigi reitingi boiynsha 190 eldiń arasynda 36 orynǵa ie boldy», - dedi Nazarbaev.
Jiyn barysynda Prezident elshilerge Astana halyqaralyq qarjy ortalyǵynyń jumysyn jandandyrýǵa shaqyrdy.
«EKSPO-2017» kórmesi barysynda jasyl tehnologiiany damytý jóninde halyqaralyq ortalyǵy men IT startaptardyń halyqaralyq tehnoparki quryldy. Astana halyqaralyq qarjy ortalyǵynyń qyzmetin jandandyrý - Qazaqstannyń basty basymdyqtarynyń biri. Osyǵan orai sizder de halyqaralyq qarjy ortalyǵyn damytýǵa atsalysyp, onyń igiligin kórýge shaqyramyz. Ózara tiimdi saýda ekonomikalyq yntymaqtastyqty nyǵaitý úshin Qazaqstandaǵy zor múmkindikterdi keńinen paidalaný qajet», - dedi Memleket basshysy.
Osy oraida Nursultan Nazarbaev biyl elimizde birqatar mańyzdy halyqaralyq is-shara ótetinin málimdedi.
«Astana ekonomikalyq forýmy, álemdik jáne dástúrli din kóshbasshylarynyń 6 sezi, dúniejúzilik islam ekonomika forýmy ótedi. Osy bas qosýlarǵa sizderdiń elderińiz belsene qatynasady dep oilaimyn», - dedi ol.
Sóz sońynda Prezident qyzmetterin jańadan bastaǵan elshilerdiń jumysyna tabys tiledi.
«Qurmetti elshi myrzalar, Qazaqstandaǵy diplomatiialyq qyzmetterińizdi bastaýlaryńyzmen taǵy da sizderdi quttyqtaimyn. Elimizdegi atqarǵan jaýapty qyzmetterińiz tabysty, árbir kúnderińiz sátti bolsyn. Barshalaryńyzǵa zor densaýlyq, baq-bereke tileimin», - dep túiindedi sózin Nursultan Nazarbaev.
