QR Prezidenti Nursultan Nazarbaev elordada ótip jatqan Astana Agroforum-2018 respýblikalyq keńes qatysýshylaryna quttyqtaý joldady. Elbasy quttyqtaýyn QR Premer-Ministri Baqytjan Saǵyntaev oqyp berdi, dep habarlaidy "Ult aqparat".
«Qurmetti aýyl eńbekkerleri! Agrarlyq sektory damyǵan Qazaqstan úshin astyq jinaý naýqany árdaiym mańyzdy oqiǵa sanalady. Aýa raiynyń qolaisyzdyǵyna qaramastan biylǵy jinalǵan mol ónim Sizderdiń qajyrly eńbekterińiz ben kásibi biliktilikterińizdiń nátijesi. 22 mln tonnadan astam dándi jáne dándi-burshaqty daqyl jinaldy. Bul ishki suranysty tolyq qamtamasyz etip qana qoimai, shetel naryqtaryna úlken kólemde astyq ónimin eksporttaýǵa múmkindik beredi. Mundai joǵary kórsetkish Qazaqstannyń álemdegi iri astyq ónimin óndirýshi elderdiń biri ekenin taǵy da aiǵaqtai túsedi», - dep atap ótedi Memleket basshysy.
Qazaqstan Prezidenti aýyl sharýashylyǵynda júrgizilgen júieli reformalardyń arqasynda strategiialyq mańyzy zor osy salanyń áleýeti men investitsiialyq tartymdylyǵy edáýir arta túskendigin basa aitady.
«Memleket aldaǵy ýaqytta da agroónerkásip keshenine jan-jaqty qoldaý kórsetip, zamanaýi tehnologiiany tartýǵa, eńbek ónimdiligin molaitýǵa, jáne onyń jahandyq básekege qabilettiligin kúsheitýge jaǵdai jasaityn bolady. Elimizdiń barlyq eńbekkerlerin 2018 jylǵy egin oraǵynyń tabysty aiaqtalýymen quttyqtaimyn. Qazaqstan halqy Sizderdiń azyq-túlik qaýipsizdigin qamtamasyz etip, ekonomikanyń ósýine jáne elimizdiń órkendeýine qosqan úlesterińizdi joǵary baǵalaidy. Sizderge myqty densaýlyq, baq-bereke tileimin», - dedi Nursultan Nazarbaev.
Aita keteiik, búgin forým aiasynda túske deiin «Aýyldyq jerde azamattyq qoǵamdy damytý» taqyrybynda ótken respýblikalyq konferentsiiaǵa qatysqan Ómirzaq Shókeev ekinshi deńgeili bankterdiń agroónerkásip keshenin nesieleýdegi táýekelderin tómendetý qajettigin aitqan bolatyn.
.jpeg)