QR Úkimetinde ótken baspasóz konferentsiiasynda QR indýstriia jáne infraqurylymdyq damý birinshi vitse-ministri Qaiyrbek Óskenbaev 2020-2025 jyldarǵa arnalǵan «Nurly jer» jańa baǵdarlamasynyń jobasy týraly aityp berdi.
Onyń aitýynsha, «Nurly jer» memlekettik baǵdarlamasyn júzege asyrý turǵyn úi qurylysyna baǵyttalatyn investitsiialardyń jyl saiynǵy ósimin qamtamasyz etken baǵdarlamalardyń biri boldy. Qazir 2020-2025 jyldarǵa arnalǵan «Nurly jer» ázirlený ústinde, onda turǵyndardyń tabysy men olardyń turǵyn úi baǵdarlamasyna qatysýyna baza nazar aýdarylady.
«Eger birinshi baǵdarlama tek turǵyn úi qurylysyna ǵana qatysty bolsa, ekinshi baǵdarlamanyń qamtityn máseleleri kóp. Onyń ishinde jylýmen jáne sýmen jabdyqtaý, kommýnaldyq sektordy jańǵyrtý, turǵyn úilerdi jóndeý jáne óńirlerdi damytý bar», — dedi Q. Óskenbaev.
Turǵyn úidiń qoljetimdiligi satysy engiziledi, turǵyndar tabysy aiqyndaýshy faktor bolady.
«Biz ishinde qaita baǵdarlaý jasadyq. Kezek adamdardyń tabysyna bailanysty jasalatyn bolady. Biz tabystary boiynsha shekteýdi uiǵardyq, birinshi satyǵa tabysy bir eń tómengi kúnkóris deńgeiine deiingi (2019 j. – 29 700 teńge) otbasylar jatady — olar úshin biz satyp alý quqyǵynsyz jalǵa beriletin turǵyn úi salýymyz kerek. Tabysy eki eń tómengi kórsetkish deńgeiine deiin (2019 j. – 59 400 teńge) bolatyn ekinshi sanattaǵy otbasylar úshin biz jyldyǵy 2% bolatyn jeńildikti nesie qarastyrýymyz kerek. Úshinshi sanatta –tabysy úsh eń tómengi kúnkóris deńgeiine deiingi (2019 j. — 92 000 teńge) azamattar – olar úshin biz jyldyǵy 5% tetikti usynamyz. Al tabysy budan joǵary azamattar 7-20-25 baǵdarlamasyna qatysa alady nemese ekinshi deńgeili bankter arqyly turǵyn úi alýǵa úmitker bola alady», — dep túsindirdi Q. Óskenbaev.
Onyń aitýynsha, mysaly «Baqytty otbasy» jeńildikti baǵdarlamasynda endi shekteý bolmaidy, barlyq sanattaǵy azamattar qatysa alady, olar tabystary boiynsha bólinedi.
«Baǵdarlamanyń birinshi kezeńine tek turǵyndardyń úsh sanaty ǵana qatysa alatyn. Olar – kóp balaly analar, tolyq emes otbasylar jáne múgedek balalardy tárbielep otyrǵan otbasylar. Qazir jańa baǵdarlamada eshqandai shekteý joq, kezekte turǵyndardyń bári qatysa alady, tek ishinde biz tabystary boiynsha bóletin bolamyz», — dedi indýstriia jáne infraqurylymdyq damý birinshi vitse-ministri.
Sonymen qatar Q. Óskenbaev turǵyndardyń ómirlik jaǵdailaryna bailanysty satyp alatyn turǵyn úiiniń sanatyn qaita ózgertý máselesi qarastyrylyp jatqanyn aitty.
«Jalǵa berilgen turǵyn úidi mysaly, eger adam jalǵa alsa jáne bir ýaqytta TQJB-de qarajat jinaqtaǵan bolsa, nesiege beriletin turǵyn úi sanatyna aýystyrýǵa bolady. Sondai-aq kerisinshe jaǵdai da týyndaýy múmkin, mysaly, otbasy músheleriniń biri jumyssyz qalsa jáne nesie tóleýge múmkindigi bolmasa, onda bul tetik esepshotta jinalǵan qarajatyn saqtaýdy, biraq turǵyn úidi otbasynyń jaǵdaiy jaqsarǵansha jalǵa beriletin turǵyn úi sanatyna aýystyrýdy qarastyrady. Basqasha aitqanda, biz ómirde túrli jaǵdailarǵa tap bolýy múmkin adamdar úshin barynsha jaǵdai jasaimyz», — dep qosty Q. Óskenbaev.
Aita keteiik, «Nurly jer» baǵdarlamasy aiasynda 2018 jyly 12,5 mln sh.m. nemese elimizdiń bir turǵynyna 0,68 sh.m. turǵyn úi paidalanýǵa berildi, bul TMD elderiniń arasyndaǵy eń joǵarǵy kórsetkish. Biyl 13 mln sh.m. turǵyn úidi paidalanýǵa berý josparlanǵan.
