Shymkent qalasynda biyl naýryz aiynyń sońyna deiin «Nurly jer» memlekettik baǵdarlamasy aiasynda 976 páterdi kezekte turǵan azamattarǵa satyp alý quqyǵynsyz, arendalyq negizde berý josparlanǵan, - dep habarlaidy «Ult aqparat».
Sonymen qatar, biyl jetim jáne ata-anasynyń qamqorlyǵynsyz qalǵan balalar men kópbalaly otbasylarǵa, halyqtyń áleýmettik jaǵynan álsiz toby men jumys isteitin jastarǵa 1580 páter úlestirilmek.
Bul týraly qala ákimi Murat Áitenovke 2020 jyly atqarylǵan jumystar týraly esep bergen qalalyq turǵyn úi basqarmasynyń basshysy Ǵalymjan Tólepov baiandady.
Basqarma basshysynyń aitýynsha, biyl «Nurly jer» memlekettik baǵdarlamasynyń «Baqytty otbasy» («2-10-20») nesielendirý sharty aiasynda az qamtylǵan 350 otbasyn baspanamen qamtý josparlanýda.
«Shańyraq» pilottyq jobasy boiynsha («5-10-20» nesielendirý sharty) úi kezeginde tirkelgen 1728 otbasyn baspanamen qamtamasyz etý kózdelgen. Odan bólek «Nurly jer» memlekettik baǵdarlamasynyń «7-20-25» nesielendirý sharty aiasynda 108 azamatqa páter berilmek.
Esepte kórsetilgendei, «Nurly jer» memlekettik baǵdarlamasy aiasynda Shymkentte respýblikalyq biýdjet esebinen kóp páterli 35 úidi kúrdeli jóndeý josparlanǵan. Atap aitqanda, úilerdiń lift qondyrǵylaryn aýystyrý, kommýnaldy menshiktegi úilerdi aǵymdaǵy nemese kúrdeli jóndeý qarastyrylǵan.
