"Nurly jer" baǵdarlamasy arqyly bastapqy jinaqsyz baspana alǵysy keletin qazaqstandyq otbasy ai saiyn 150-200 myń teńge aralyǵynda tabys tabýy qajet, dep habarlaidy QazAqparat tilshisi.
Bul týraly QR Investitsiialar jáne damý ministrligi Qurylys jáne turǵyn úi-kommýnaldyq sharýashylyq isteri komitetiniń tóraǵasy Marhabat Jaiymbetov Ortalyq kommýnikatsiialar qyzmetinde ótken baspasóz máslihatynda aitty.
Ministrlik ókili turǵyn úi qurylys jinaq bankiniń salymshylarynyń biyl bir millionǵa jetkenin atap ótti jáne óńirler men basty qalalardaǵy baspana baǵasyn salystyrdy.
"Memlekettik baǵdarlama boiynsha baspananyń árbir sharshy metri óńirlerde 140 myń teńgeni quraidy. Al Astana men Almatyda, Aqtaý, Atyraý qalalarynda - 180 myń teńge. Sáikesinshe, elý sharshy metr bolatyn eki bólmeli páter aimaqtarda 7 mln teńge jáne Astana, Almaty, Aqtaý, Atyraý qalalarynda 9 mln teńge. Demek, ortasha tabysy 150-200 myń teńgeni quraityn otbasy ai saiyn 50-70 myń teńgeden tólei alady. Osylaisha, 7-10 jyl aralyǵynda páter qunyn tolyq óteýge bolady", - dep jaýap berdi M.Jaiymbetov QazAqparat tilshisiniń suraǵyna.
Aita keteiik, Ortalyq kommýnikatsiialar qyzmetinde QR Investitsiialar jáne damý ministrligi Qurylys jáne turǵyn úi-kommýnaldyq sharýashylyq isteri komitetiniń tóraǵasy Marhabat Jaiymbetov «Nurly jer» baǵdarlamasynyń 10 aidaǵy qorytyndysyn jariialady.
Jyl basynan beri Qazaqstanda barlyq qarjylandyrý esebinen 8,8 mln sharshy metr (77 myń baspana) paidalanýǵa berilgen. Atap aitqanda, 5,1 mln sharshy metr (56,7 myń páter) kópqabatty turǵyn úi jáne 3,7 mln sharshy metr (24,1 myń páter) jeke turǵyn úi turǵyzylǵan.
Turǵyn úilerdi paidalanýǵa berý boiynsha aldyńǵy qatarda Astana (2,2 mln sh.m), Almaty (1,2 mln sh.m) qalalary men Mańǵystaý (676 myń sh.m), Atyraý (555 myń sh.m) jáne Ońtústik Qazaqstan (525,5 myń sh.m) oblystary tur.
