Pavlodar oblysynyń ákimi Bolat Baqaýov kópbalaly otbasylardy kóshiretin «Nurly Ertis» jobasy týraly baiandady, dep habarlaidy QazAqparat tilshisi.
«Biyl Nur-Sultan men eńbek kúshi jetkilikti ózge de óńirlerden kópbalaly otbasylardy kóshiretin «Nurly Ertis» jobasy Prezident pen Úkimetten qoldaý tapty. Ekibastuz qalasyna 235 kópbalaly otbasy nemese 1303 adam kóship keldi. Olardyń arasynda 862 bala bar. Qazir eńbekke qabiletti qonys aýdarýshylar turaqty jumys istep, eńbekaqy alyp otyr», - dedi ákim Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, balalarǵa balabaqshalar men mektepterden oryn berilgen.
«Barlyq otbasy jaily páterlerge jaiǵastyryldy. Bul baǵdarlama boiynsha ári qarai da úi salýǵa daiynbyz. Qarjylandyrý bar. Úi turǵyzý úshin injenerlik toraptyq jeliler júrgizilgen, áleýmettik infraqurylymy bar daiyn alańdar bar», - dedi Bolat Baqaýov.
Aita keteiik, Pavlodar oblysynyń ákimi Bolat Baqaýov elordada 2019 jyldyń 10 aiyndaǵy óńirdiń áleýmettik-ekonomikalyq damýy týraly esep berýde. Buǵan deiin ákim óńirdiń eksporttyq áleýeti, investitsiialyq jobalary týraly baiandaǵan bolatyn.
