QR Parlamenti Májilisiniń tóraǵasy Nurlan Nyǵmatýlin Japoniianyń Qazaqstandaǵy elshisi Itiro Kavabatany qabyldady, dep habarlaidy "Ult aqparat".
Májilistiń baspasóz qyzmetiniń habarlaýynsha, Nurlan Nyǵmatýlin elshi myrzanyń qazaqstandyq-japondyq qarym-qatynasty, sonyń ishinde, parlamentaralyq bailanysty nyǵaitýǵa zor úles qosqanyn atap ótken.
Qazaqstan Prezidenti Nursultan Nazarbaevtyń Japoniiany mańyzdy strategiialyq áriptes retinde baǵalaitynyn alǵa tartqan Májilis tóraǵasy Astana men Tokio arasyndaǵy dástúrli dostyq qatynas búginde ózara tiimdi áriptestik jáne yntymaqtastyq negizinde joǵary deńgeide damyp kele jatqanyn jetkizdi.
Osy rette taraptar bizdiń elderimiz basshylarynyń turaqty kezdesýlerine nazar aýdaryp, Qazaqstan Prezidenti Nursultan Nazarbaevtyń jáne Japoniia Premer-Ministri Sindzo Abeniń ózara saparlary ekijaqty qatynasty damytýǵa jańa serpin bere otyryp, ony keńeitilgen strategiialyq áriptestik deńgeiine jetkizgenine toqtaldy.
Óz kezeginde I. Kavabata elshilik qyzmetin Qazaqstan úshin mańyzdy, tarihi kezeńderde tabysty atqarǵanyn aita kelip, Qazaqstannyń damý qarqynyna joǵary baǵa berip, birligi jarasqan halyqtyń yntymaǵyna rizashylyq sezimin bildirdi.
