Palata Spikeri Nurlan Nyǵmatýlinniń tóraǵalyq etýimen ótken Májilistiń jalpy otyrysynda biznes-ortany damytý jáne saýda qyzmetin retteý máseleleri boiynsha zańnamalyq túzetýler ekinshi oqylymda maquldandy, dep habarlaidy "Ult aqparat" vedomstvonyń baspasóz qyzmetine silteme jasap.
Zań jobasynyń mańyzdylyǵyna toqtalǵan Nurlan Nyǵmatýlin bul qujat Memleket basshysynyń biznes-ortany odan ári damytý jónindegi tapsyrmasyn iske asyrý maqsatynda ázirlengenin atap ótti. Palata Spikeriniń pikirinshe, qabyldanǵan túzetýler kásipkerlikti qoldaýdyń tiimdi mehanizmin qurýǵa múmkindik beredi. Óitkeni, bul eń aldymen, jańa kásiporyndar ashý, nesie alý, qurylysqa ruqsat berý jáne salyq salýǵa jaǵdai jasaidy.
«Bul jolda búgingi engizilip otyrǵan ózgerister biznes salasyn damytýǵa, saýda qyzmetin nyǵaitýǵa erekshe yqpal etetin bolady. Sonymen birge, kásipkerler úshin de óte tiimdi. Osynyń barlyǵy shaǵyn jáne orta biznestiń ekonomikalyq qýatyn kúsheitýge serpin beretini sózsiz», - dedi Nurlan Nyǵmatýlin.
Máselen, 2020 jyldan bastap taýarlardy tańbalaý jáne saýda-sattyq qyzmetinde kassalyq-baqylaý quraldaryn paidalaný erejeleri engizildi.
Depýtattardyń usynysy boiynsha osy zań jobasynda qarastyrylǵan ónimderdi tańbalaýmen óndirýshilerdiń ózderi nemese Biryńǵai ónimdi tańbalaýshy operatorlar ainalysatyn bolady. Sonymen qatar, Biryńǵai operatorǵa qalalarda ǵana emes, sonymen qatar barlyq oblystyq ortalyqtarda tańbalaý qyzmetterin usyný úshin óz filialdary men tiisti jabdyqtary bolýy kerek.
Jumys tobynyń zań jobasymen jumysy barysynda depýtattar qolma-qol aqshasyz tólemderdi yntalandyrý maqsatynda salyqtyq ákimshilendirýdi ońailatý; múgedekterge áleýmettik qyzmetter kórsetý kezindegi kiristerdi salyq salýdan bosatý; salynǵan ákimshilik aiyppuldy merziminen buryn tólegen kezde shartty jeńildik berý; tolyq deklaratsiia berý merzimin uzartý arqyly kedendik ákimshilendirýdi ońailatý, sondai-aq halyqaralyq poshta jóneltilimderi kezinde kedendik rásimderdi ońailatý; elektrondyq saýda alańdaryn damytý jáne elektrondyq saýdany júzege asyrǵan kezde satyp alýshylardyń quqyqtaryn qorǵaý jónindegi normalardy naqtylaý boiynsha túzetýler engizdi.
Jalpy alǵanda, zań jobasynda Qazaqstan Respýblikasynyń 10 kodeksi men 28 zańyna ózgerister men tolyqtyrýlar engizý kózdelgen.
Sondai-aq Májilis depýtattary «Qazaqstan Respýblikasynyń keibir zańnamalyq aktilerine menshik quqyǵyn qorǵaýdy kúsheitý, tórelik, sot júktemesin ońtailandyrý jáne qylmystyq zańnamany odan ári izgilendirý máseleleri boiynsha ózgerister men tolyqtyrýlar engizý týraly» QR Zańynyń jekelegen tarmaqtarynda Elbasynyń qarsylyqtarymen kelisti. Atap aitqanda, atalǵan másele azamattardyń múliktik quqyqtaryn qorǵaýdy kúsheitýge qatysty bolyp otyr.
«Ózderińizge belgili, Parlament 2018 jylǵy 27 jeltoqsanda atalǵan Zańdy qabyldap, ol 28 jeltoqsanda Memleket basshysynyń qol qoiýyna engizildi. Qabyldanǵan Zań 2017 jylǵy 31 qańtardaǵy jáne 2018 jylǵy 5 qazandaǵy Prezidenttiń Joldaýlaryn iske asyrýǵa baǵyttalǵan. Prezident tutastai alǵanda bul Zańǵa qoldaýyn bildiredi, biraq qabyldanǵan zańda alyp tastaǵan azamattardyń múliktik quqyqtarynyń kepildikteri týraly zańnamanyń jekelegen qoldanystaǵy erejelerin saqtaý qajet dep oilaidy. Baiandalǵandy eskere otyryp, QR Konstitýtsiiasynyń 44- babynyń 2- tarmaqshasyna sáikes, Elbasy Zańnyń 1-baby 2-tarmaǵynyń 5) jáne 6) tarmaqshalaryn alyp tastaýdy usyndy», - dedi QR Prezidenti Ákimshiligi basshysynyń orynbasary Áliia Raqysheva.
Májilistiń jalpy otyrysy barysynda palata depýtattary atalǵan usynyspen tolyqtai kelisti.
