QR Parlamenti Májilisiniń jalpy otyrysynda Palata tóraǵasy Nurlan Nyǵmatýlin jol politsiiasy qyzmetkerlerine alataiaqtyń qaitarylýy týraly ázildedi, dep habarlaidy QazAqparat.
«Qazaqstan men Armeniia Úkimetteri arasyndaǵy azamattyq qorǵanys, tótenshe jaǵdailardyń aldyn alý men olardy joiýdaǵy yntymaqtastyq kelisimin ratifikatsiialaý týraly» zań jobasyn talqylaýda Májilis Tóraǵasy Ishki ister ministrinen qazaqstandyq taraptyń shyǵyndaryn óteý týraly suraq qoidy.
«Tótenshe jaǵdaida kómektesý úshin alǵashqy úsh táýlikte qazaqstandyq qutqarý jasaǵy óz qarajatyn jumsaidy. Iaǵni, úsh táýlikke jeterlik azyq-túlik, shatyr, tósek-oryn, jabdyqtar beriledi. Odan keiingi kúnder úshin kómek suraǵan memleket barlyq qaýip-qater seiilgenshe qarjylandyrýy tiis», - dep jaýap berdi QR Ishki ister ministri Erlan Turǵymbaev.
Osy oraida Nurlan Nyǵmatýlin alǵashqy táýlikter shyǵynyn úkimettik komissiia óteitinin atap ótti.
«Keiinirek úkimettik komissiia sheshimimen barlyq shyǵyndaryńyz óteledi. Taǵy da Ishki ister ministrliginiń esebi túgel. Olarǵa qazir qarajat basqa nársege kerek. Alataiaqty qaitaryp berdi ǵoi. Bul durys. Hirýrgke qandaýyry (skalpel) qandai mańyzdy bolsa, politsei úshin de alataiaq mańyzdy», - dedi Májilis tóraǵasy.
Eske sala ketsek, Ishki ister ministrligi 1 qyrkúiekten bastap jol qozǵalysyn retteý úshin alataiaqty qaita qoldanýǵa kóshedi. Endi politseidiń ústinde sary tústi keýdeshe, jaryq shaǵylystyrǵysh qolǵap, sondai-aq alataiaq, jáne ysqyrǵysh bolady.
