Parlament Májilisiniń tóraǵasy Nurlan Nyǵmatýlin palatanyń 2020 jylǵy jumysyn qorytyndylady, dep habarlaidy QazAqparat tilshisi.
Onyń atap ótýinshe, depýtattyq korpýstyń jumysy tolyqtai Tuńǵysh Prezident- Elbasy Nursultan Ábishuly Nazarbaevtyń strategiialyq tapsyrmalaryn jáne Memleket Basshysy Qasym-Jomart Kemeluly Toqaevtyń bastamalaryn, sondai-aq halyqqa Joldaýyn sapaly zańdarmen qamtamasyz etýge arnaldy.
«Onyń ishinde, áleýmettik qorǵaý, densaýlyq saqtaý, bilim, shaǵyn jáne orta biznesti qoldaý, ekologiialyq jaǵdaidy jaqsartý negizgi baǵyttardyń biri boldy. Qabyldanǵan barlyq zańdar halqymyzdy áleýmettik qoldaýǵa, elimizdi odan ári damytýǵa yqpal etetini sózsiz», - dedi Májilis tóraǵasy.
Tutastai alǵanda, osy shaqyrylym barysynda Parlament palatalarynyń 23 birlesken otyrysy, Májilistiń 1208 másele qaralǵan 186 jalpy otyrysy ótken.
«Osy ýaqyt ishinde palatanyń qaraýynda 487 zań jobasy bolyp, onyń 432-si maquldanyp, Senatqa joldandy. Al, búgingi tańda 391 zań jobasyna Memleket basshysy qol qoidy», - dedi N. Nyǵmatýlin.
Onyń sózine qaraǵanda, Májilis depýtattary osy shaqyrylymda (VI shaqyrylymda depýtattar) 60 zań jobasyna ózderi bastamashy boldy.
Sonymen qatar, «Halyq densaýlyǵy jáne densaýlyq saqtaý júiesi týraly», «Ekologiialyq kodeks», «Ákimshilik rásimdik-protsestik kodeks» jáne Salyq jáne biýdjetke tólenetin basqa da mindetti tólemder týraly (Salyq kodeksi), sondai-aq, Kedendik retteý jáne Jer qoinaýy jáne jer qoinaýyn paidalaný týraly alty mańyzdy kodeks qabyldandy.
«Erekshe aitý kerek, bizdiń depýtattyq korpýs elde qalyptasqan jaǵdai kezinde de, karantin kezinde óz jumysyn bir kúnge de toqtatqan joq. Qaita, zamanǵa sai tehnologiialardy paidalanyp, tiimdi jumys jasadyq», - dedi Nurlan Nyǵmatýlin.
Májilis qyzmeti barysynda halyq kótergen naqty máselelerdi sheshýge únemi kóńil bólip keledi. Osy bes jyl ishinde májilismender 1150 depýtattyq saýal joldap, turǵyndardan 23 700-ge jýyq hat kelip, tiisti jaýaby qaitarylǵan.
Munymen qosa, depýtattar óńirlerdi aralap, 17 myńnan astam kezdesýler uiymdastyryp, 1 mln-nan astam adammen kezdesýler ótkizdi.
Nurlan Nyǵmatýlin altynshy shaqyrylymdaǵy Parlament Májilisiniń jumysy ashyq ta nátijeli bolǵanyn atap ótip, zań jobalaryn talqylaityn jumys toptarynyń quramyna parlamenttik emes partiialardyń, úkimettik emes uiymdar men qoǵamdyq birlestikterdiń ókilderi shaqyrylatynyn aityp, Májilistiń jalpy otyrystary, komitetterdiń jiyndary bedeldi aqparattyq saittarda, portaldarda onlain túrde kórsetiletinine toqtaldy.
Búgingi jalpy otyrysty qorytyndylaǵan Májilis tóraǵasy depýtattarǵa elimizdiń zańnamalyq bazasyn jetildirip, otandyq parlamentarizmdi damytýǵa qosqan eleýli úlesteri úshin, zań shyǵarý protsesine belsendi aralasqan barlyq memlekettik organdardyń, azamattyq qoǵamnyń, saraptamalyq qoǵamdastyqtyń ókilderine alǵysyn bildirdi.
