Májilis Tóraǵasy Nurlan Nyǵmatýlin Qatarda ótip jatqan Parlamentaralyq Odaqtyń 140-shy Assambleiasynyń qatysýshylarymen parlamentaralyq áriptestikti damytý máselelerin talqylady. Bul týraly búgin Májilistiń baspasóz qyzmeti habarlady.
Parlamentaralyq odaqtyń tóraǵasy Gabriela Kýevas Barronmen áńgime barysynda Qazaqstan Parlamenti atalǵan uiymmen yntymaqtastyqty odan ári nyǵaitýǵa yntaly ekeni aityldy.
Májilis tóraǵasynyń pikirinshe, búgingi kúni álemniń 178 elinen Parlament ókilderin biriktiretin parlamentaralyq Odaq zańnamalyq tájiribe almasý úshin jáne quqyq qoldaný tájiribesinde qajetti dialog alańy.
Nurlan Nyǵmatýlin Qatar Konsýltativtik Keńesiniń Basshysy Ahmad ben Abdalla ben Zaid Al Mahmýdpen kezdesý barysynda Qatar Memleketi Qazaqstannyń mańyzdy seriktesi ekenin, Elbasymyz Nursultan Nazarbaev negizin qalaǵan bizdiń saiasi baǵytymyz odan ári jalǵasatynyn jáne memleketterimizdiń ózara bailanysy ári qarai tereńdei beretinin aitty. Májilis Spikeri atap ótkendei, eki eldiń Parlament ókilderiniń arasyndaǵy bailanystardy tereńdetý yntymaqtastyq toptary men tiisti komitetterdiń ózara kezdesýleri arqyly jalǵaspaq.
Al, Qytai Halyq Respýblikasy Búkilqytailyq halyq ókilderi Jinalysy Turaqty Komiteti tóraǵasynyń orynbasary Shen Iýe Iýe-men áńgimelesý barysynda Májilis Tóraǵasy «Nurly jol» baǵdarlamasynyń «Bir beldeý, bir jol» jobasy boiynsha birlesken jumysynyń nátijelerine nazar aýdardy. Bul «Qorǵas» qurǵaq porty, Aqtaý porty, «Qazaqstan - Túrikmenstan - Iran» jańa temirjol dálizi; «Batys Eýropa - Batys Qytai» halyqaralyq tranzittik dálizi. Taraptar ortaq mindetterdi sheshý jolynda qazaqstandyq jáne qytailyq Parlament ókilderiniń eki jaqty jáne halyqaralyq parlamenttik uiymdar sheńberinde yntymaqtastyǵy odan ári arta beretinine senim bildirdi.
Nurlan Nyǵmatýlinniń Belgiia Parlamenti Ókilder Palatasynyń Tóraǵasy Zigfrid Brakemen kezdesýinde qoljetkizilgen parlamentaralyq ózara is-qimyldy odan ári damytý týraly aityldy.
Májilis Spikeri atap ótkendei, jyl saiyn ótkiziletin «Qazaqstan Respýblikasy - Eýropalyq Odaq» parlamenttik yntymaqtastyq komitetiniń otyrystary parlamentshilerge ózekti máselelerdiń keń aýqymy boiynsha pikir almasýǵa, sondai-aq zańnamalyq qyzmettiń tájiribesin zerdeleýge múmkindik beredi.
Barlyq kezdesýlerde Palata Spikeri Nurlan Nyǵmatýlin áriptesterin aǵymdaǵy jyldyń 23-24 qyrkúiek aralyǵynda Nur-Sultan qalasynda ótetin «Úlken Eýraziia: Dialog. Senim. Seriktestik» degen Eýraziia elderi parlamentteri Spikerleriniń IV Keńesine qatysýǵa shaqyrdy.
Parlamentaralyq Odaqtyń 140-shy Assambleiasy aiasynda Májilis tóraǵasy Armeniia, Bangladesh, Vetnam, Iran, Makedoniia, Malta jáne Túrkiialyq áriptesterimen kelissózder júrgizdi.
- Osy Qatar memleketinde ótken barlyq kezdesýlerde Parlament ókilderi qyrkúiek aiynda Nur-Sultan qalasynda ótetin Eýraziia elderi Parlamentteri spikerleriniń tórtinshi Keńesine erekshe yqylas kórsetip otyr. Bul - eń aldymen, Elbasymyz Nursultan Ábishuly Nazarbaevtyń halyqaralyq bedeli jáne álemdik saiasattaǵy róli óte joǵary ekeniniń taǵy bir naqty kórsetkishi, taǵy bir naqty dáleli dep sanaimyz, - Nurlan Nyǵmatýlin kezdesý qorytyndysynda.
