Búgin Májilis tóraǵasy Nurlan Nyǵmatýlin Qatar memleketiniń Qazaqstandaǵy Tótenshe jáne Ókiletti elshisi Ahmed ben Áli Ál - Támimimen kezdesti, dep habarlaidy "Ult aqparat" Májilistiń baspasóz qyzmetine silteme jasap.
Kezdesýde elder arasyndaǵy yntymaqtastyqty odan ári damytýdyń mańyzdy máseleleri talqylandy. N. Nyǵmatýlin Qatar Qazaqstannyń mańyzdy seriktesi ekenin alǵa tarta kelip, áriptestikti odan ári belsendi túrde tereńdetý qajettiligine toqtaldy. Eki el arasynda diplomatiialyq qarym-qatynas ornaǵan 26 jyl ishinde, Qazaqstan men Qatar kóp baǵytty áriptestikti nyǵaitýda joǵary tabystarǵa qol jetkizdi.
Taraptardyń aitýynsha, ol eki memleket basshylarynyń ózara túsinistik pen dostyq nietke negizdelgen tiimdi jumystarynyń nátijesi.
Nurlan Nyǵmatýlinniń pikirinshe, Qazaqstan men Qatardyń saýda-ekonomikalyq áleýeti óte zor. Osyǵan orai, N. Nyǵmatýlin Qatar kásipkerlerin Qazaqstandaǵy qarjy salasy, aýyl sharýashylyǵy, kólik-logistikalyq, týristik infaqurylymdardy damytý boiynsha investitsiialyq jobalarǵa qatysýǵa shaqyrdy.
Óz kezeginde Ahmed ben Áli Ál-Tamimi myrza, Qatar Ámiri Qazaqstan Prezidenti Nursultan Nazarbaevtyń árbir bastamasyna asa qurmetpen qaraityndyǵyn jáne eki el arasyndaǵy qatynasty damytýǵa árqashanda yntaly ekenin jetkizdi. Sondai-aq, Qatar memleketi saiasi, ekonomikalyq basqa da baǵyttarda qoldaý kórsete otyryp, qos memleketke tiimdi jobalardyń barlyǵyna qatysýǵa daiyn ekendigin bildirdi.
Odan ári kezdesý ieleri halyqaralyq jáne parlamentaralyq yntymaqtastyq jaiyn sóz etti. Palata Spikeri ekijaqty qarym-qatynasty nyǵaitýda parlamentaralyq yqpaldastyqtyń róli zor ekenin aityp yntymaqtastyq jónindegi toptar men beiindi komitetter arqyly ózara saparlar praktikasyn engizý qajettigin, ol zańnama salasynda jan-jaqty tájiribe almasýǵa múmkindik beretinine toqtaldy.
