Májilis tóraǵasy Nurlan Nyǵmatýlin Aýstriia Respýblikasyna resmi sapary barysynda Aýstriia Ulttyq Keńesiniń Tóraǵasy Volfgang Sobotkamen kelissózder júrgizdi, dep habarlaidy "Ult aqparat" Májilistiń baspasóz qyzmetine silteme jasap habarlaidy.
Kezdesý barysynda taraptar Qazaqstan Táýelsizdik alǵan kúnnen bastap eki el arasynda syndardy jáne turaqty bailanys ornaǵanyn atap ótti.
Májilis Tóraǵasynyń pikirinshe, Aýstriia Qazaqstan úshin Eýropalyq Odaqtaǵy negizgi áriptesterdiń biri, sondyqtan elder arasyndaǵy eki jaqty yntymaqtastyqty odan ári tereńdetý mańyzdy bolyp tabylady. N.Nyǵmatýlin atap ótkendei, qos memleket basshylarynyń resmi saparlary jan-jaqty yqpaldastyqty kúsheitýdiń berik irgetasyn qalady.
Qazirgi ýaqytta eki el arasyndaǵy saýda ainalymy bir milliard evrony quraidy. Búginde Qazaqstan Aýstriia aimaǵyndaǵy eń mańyzdy saýda seriktesi bolyp tabylatyny sózsiz dei kelip, Ulttyq Keńes Tóraǵasy Volfgang Sobotka elder arasyndaǵy saiasi dialogty odan ári arttyrýǵa nietti ekenin jetkizdi.
Ótkizilgen kelissózder barysynda N.Nyǵmatýlin men V.Sobotka beiindi komitetter men yntymaqtastyq jónindegi toptar deńgeiinde parlamentaralyq ózara is-qimyldy odan ári nyǵaitýdy, zańnamalyq tájiribe almasý jóninde mańyzdy kelisimderge qol jetkizdi. Sonymen birge, saýda-ekonomikalyq bailanystar, innovatsiia, ekonomikany tsifrlandyrý, «jasyl tehnologiia», týrizm, aýyl sharýashylyǵy men mádeni-gýmanitarlyq salanyń áleýettik baǵyttaryn zańnamalyq súiemeldeýdiń mańyzdylyǵyna nazar aýdaryldy.
Májilis Tóraǵasynyń aitýynsha búginde Qazaqstan Respýblikasy men Eýropalyq Odaq arasyndaǵy yntymaqtasty jáne áriptestikti keńeitý týraly Kelisimniń áleýeti zor. Bul Kelisimdi Aýstriia Respýblikasy da ratifikatsiialady.
Sondai-aq, Spikerler halyqaralyq jáne parlamentaralyq uiymdar arasynda bailanysty nyǵaitý týraly da kelisimge keldi. Oǵan qazaqstandyq Parlament ókilderiniń EQYU Parlamenttik Assambleiasy qyzmetine belsene aralasýy jáne Aýstriialyq áriptestermen etene is qimyl jasaýy oń yqpalyn tigizedi.
«EQYU-ǵa múshe bolýymyz bizdiń qatynasymyzdaǵy eń myqty tetik retinde baǵalaimyn», - dedi V. Sobotka.
Qazaqstannyń biraz ýaqyttan beri halyqaralyq qoǵamdastyqtyń tolyq múshesi retinde tabysty jumys istep kele jatqany da qyzyǵýshylyq týǵyzady. Oǵan mysal retinde, 2010 jyly Astanada ótken EQYU sammitin jáne Aýstriia eli de qatysqan EKSPO-2017 Halyqaralyq kórmesin atap ótýge bolady. Óz sózinde V.Sobotka Eýropalyq Odaqtyń jańa Strategiiasy Ortalyq Aziia úshin Qazaqstanmen yntymaqtastyqta áleýetterdi baǵyndyrýǵa múmkindik beredi dei otyryp, turaqty damý men jastar máselesine erekshe kóńil bóldi.
Osyǵan bailanysty, Májilis Tóraǵasy Qazaqstan Respýblikasynyń Prezidenti Nursultan Nazarbaevtyń beibitshilik pen halyqaralyq qaýipsizdikti nyǵaitýǵa baǵyttalǵan aýqymdy bastamalaryna airyqsha nazar aýdardy. Jastardyń zamanaýi róline toqtalǵan Májilis Spikeri osy jyldyń qańtar aiynda Qazaqstanda «Jastar jyly» ashylǵanyn atap ótti.
«Qazaqstan Respýblikasynyń Prezidenti Nursultan Nazarbaev bilimdi jastar eldiń jahandyq básekege qabilettiliginiń basty faktory ekenin aitty. Búginde bizdiń elimiz tsifrly tehnologiialyq damýǵa batyl qadam jasaýda. Sondyqtan jastardy qoldaý jónindegi keshendi sharalar memlekettik saiasattyń basym baǵyty bolyp tabylady», - dedi N.Nyǵmatýlin.
Kezdesý sońynda Májilis Tóraǵasy Nurlan Nyǵmatýlin Aýstriia Parlamenti Ulttyq Keńesiniń Tóraǵasy Volfgang Sobotkany 2019 jylǵy 23-24 qyrkúiekte Astana qalasynda ótetin Eýraziia elderi parlamentteri tóraǵalarynyń tórtinshi otyrysyna qatysýǵa shaqyrý hatyn tabystady. N.Nyǵmatýlinniń aitýynsha, bul qazaqstandyq jáne aýstriialyq Parlament ókilderiniń arasyndaǵy yntymaqtastyqty odan ári nyǵaitýǵa múmkindik beredi.
