QR Parlamenti Májilisiniń tóraǵasy Nurlan Nyǵmatýlin bilim berý sapasy úshin jaýapkershilik joǵary oqý oryndarynyń ózderine júkteledi, alaida bilim berý qyzmetin baqylaý saqtalatyn bolady dep esepteidi.
Búgin jalpy otyrysta Májilis bilim berý máseleleri boiynsha depýtattyq zań jobasyn birinshi oqylymda maquldady, dep habarlaidy "Ult aqparat" QR Parlamenti Májilisiniń baspasóz qyzmetine silteme jasap.
Depýtattar ázirlegen ózgerister bilim berý protsesin odan ári jetildirýge, onyń ishinde bilim berý jetistikteriniń monitoringin júzege asyrýǵa baǵyttalǵan.
Osyǵan bailanysty usynylǵan bilim berý jetistikterin baqylaýdyń qazirgi bilim jetistikterin syrttai baǵalaýdan aiyrmashylyǵy týraly másele kóterildi.
«Menińshe, bul suraqty áli de qarastyrý qajet. Sebebi, bilim salasy ol - eldiń bolashaǵy. Sondyqtan, bul salada barlyq jańalyqtar óz ýaqytynda jedel qolǵa alynyp otyr. Mysaly, eki jyl buryn ǵana Zań boiynsha joǵary oqý oryndaryna akademiialyq jáne basqarýshylyq erkindik berildi. Sonymen birge, kelesi jyldan bastap jeke diplom berý de qolǵa alynatyn bolady. Osynyń barlyǵy, oqý oryndarynyń zamanǵa sai, erkin, ashyq jáne sapaly jumys isteýi úshin jasalyp otyrǵan qadamdar», - dedi Nurlan Nyǵmatýlin.
Sonymen qatar, Májilis tóraǵasy 2021 jyldan bastap joǵary oqý oryndary jeke úlgidegi diplomdardy bere bastaitynyn aityp, zań júzinde joǵary oqý oryndaryna bilim berý qyzmetinde tolyq derbestik berilgenine toqtaldy.
Eger solai bolsa, onda bilim sapasy úshin jaýapkershilik joǵary oqý oryndarynyń ózderine júkteledi, - dedi N.Nyǵmatýlin.
Sondai-aq, Májilis tóraǵasynyń pikirinshe, JOO-nyń derbestigi - bul diplomdarǵa mór basý múmkindigi dep oilamaý kerek.
Osy rette Palata Spikeri: «Árbir JOO ózderi bergen diplomyn baǵalai bilýi kerek. Osyǵan bailanysty joǵary oqý oryndarynda bilim berý jetistikterine monitoring júrgizý qanshalyqty oryndy degen suraq týyndaidy? Onyń ústine, bul monitoring qandai da bir JOO-nyń bilim berý baǵdarlamalarynyń sapasy týraly eshqandai túsinik bermeidi. Taǵy bir aita ketetin jaǵdai, bilim berý qyzmetin baqylaý kerek. Endi ýniversitetter baqylaýsyz qalýy múmkin degen jalǵan pikir qalyptaspaýy kerek», - dedi.
Májilis tóraǵasy atap ótkendei, mundai baqylaý bar - kásipkerlik sýbektileri retinde barlyq joǵary oqý oryndaryna baqylaý Kásipkerlik kodekske sáikes júzege asyrylady.
Nurlan Nyǵmatýlinniń aitýynsha, Bilim ministrligi Bas prokýratýranyń Quqyqtyq statistika ortalyǵy arqyly naryq sýbektisi retinde kirip, qarai alady. Sonymen qatar, barlyq JOO-lar qazir naryq sýbektileri bolyp tabylady jáne biliktilik talaptaryna, bilim berý standarttaryna sai keledi. Bul ýákiletti organǵa, iaǵni Bilim ministrligine joǵary oqý oryndarynyń bilim berý qyzmetin tereńirek taldaýǵa jáne olarǵa tiisti baǵa berýge múmkindik beredi.
Osyǵan sáikes, Májilis tóraǵasy ekinshi oqylymǵa deiin ázirleýshilermen birge jumys tobyna osy máseleni muqiiat qarastyrýdy tapsyratynyn aitty.
