Atyraý oblysynyń ákimi Nurlan Noǵaev jeti han jatqan Saraishyqqa úiindi dep qaraýǵa bolmaitynyn aitty. Bul týraly aimaq basshysynyń "Qazaqstan" Ulttyq arnasyndaǵy "Basty taqyryp" baǵdarlamasyna bergen keshegi suhbatynda belgili boldy.
Saraishyqty saqtap qalý múmkin be degen saýalǵa oblys ákimi saqtap qalý qajet ekenin aityp jaýap berdi.
– Saraishyqta, bireý biler, bireý bilmes, mamandardyń aitýynsha, qazaqtyń jeti hany jerlengen. ...Bul ne úshin kerek bizge? Siz aitqandai bosqa ýaqyt ótkizip jatqan joqpyz ba? Bul jatqan topyraq úiindileri ǵoi. Sony qazbalai berip ne qylymyz, qarajat jumsap ne qylamyz degendei. Biraq, halyq aitqandai, ótkendi bilmei, bolashaq bolmaidy. ...Saraishyqty saqtaý kerek, – dedi ol.
Aita ketelik, byltyr Atyraý oblysynyń ákimdigi 1,5 milliard teńge qarastyryp, kóne shahardy shaiyp bara jatqan Jaiyq ózeniniń jaǵasyn bekitýdi bastady. Sonymen qatar, Mádeniet jáne sport ministrligi ejelgi qalany qalpyna keltirý úshin taǵy 100 million teńge bóletinin málimdedi. Saraishyq qalasyn týristik ortalyqqa ainaldyrý úshin kásipkerlerdi tartý josparlanyp otyr.
Kóne shahar Atyraý qalasynan 45 shaqyrym jerde Jaiyq ózeniniń jaǵasynda ornalasqan. Altyn ordanyń saiasi, ekonomikalyq ortalyqtarynyń biri bolǵan qala Qasym hannyń tusynda Qazaq handyǵynyń astanasy atandy. Jibek jolynyń boiynda turǵan munda 7 han jerlengen. Olar: Móńke, Toqtaǵý, Jánibek, Ámir Oqas, Qasym han, Shih Mamai jáne Júsip handar.
