Mańǵystaý oblysynyń ákimi Nurlan Noǵaev Jańaózen qalasynda gaz baǵasyn tómendetýdi talap etken kólik ielerimen kezdesti, - dep habarlaidy Tengrinews.kz tilshisi oblys ákiminiń baspasóz qyzmetine silteme jasap.
Nurlan Noǵaev jinalǵandarǵa Memleket basshysy Qasym-Jomart Toqaevtyń tapsyrmasy boiynsha gazǵa baǵa belgileýge qatysty úkimet qabyldaǵan sharalardy túsindirdi.
Qazirgi ýaqytta Qazaqstan Respýblikasynyń premer-ministri Asqar Maminniń ókimimen Mańǵystaý oblysynyń áleýmettik-ekonomikalyq jaǵdaiyn qaraý jónindegi Úkimettik komissiia qurylǵanyn, olar gazdyń baǵasyn retteý boiynsha keshendi sharalardy júzege asyrýǵa nietti ekenin aitty.
Ákim óńirdegi janar-jaǵarmai quiý beketteriniń ieleri biznestiń áleýmettik jaýapkershiligi aiasynda gazdyń litrin 120 teńgeden 85-90 teńgege deiin tómendetýge belsendi sheshim qabyldaǵanyn aitty.
"Baǵa dálizderin qurý jáne janarmai baǵasynyń alypsatarlyq ósýine jol bermeý arqyly baǵanyń uzaq merzimdi turaqtylyǵyn qamtamasyz etý boiynsha júieli sharalar qabyldanady. Janarmai quiý beketteriniń ielerine qatysty básekelestikti qorǵaý jáne damytý agenttigi tekserýdi bastady", - dedi Nurlan Noǵaev.
Oblys ákimi jinalǵandardy máselelerdi zańdy jolmen, syndarly dialog arqyly sheshýge shaqyrdy.
