Mańǵystaý oblysynyń ákimi Nurlan Noǵaev Aqtaýdan turǵyn úi qorynan jaldamaly baspana alǵan Jańaózen qalasynyń turǵyndary - bir top áielmen, sondai-aq Aqtaý qalasynyń kópbalaly analarymen kezdesti, dep habarlaidy QazAqparat.
Óńir ákimi baspasóz qyzmetiniń málimetinshe, ákimdikke kelgen analar Jańaózen qalasynan Aqtaýǵa qonystandyrý baǵdarlamasy aiasynda 2019-2022 jyldary aralyǵynda jalǵa berilgen páterlerin jekeshelendirip berýdi talap etken. Sondai-aq páterdi jalǵa alý jáne kommýnaldyq qyzmetter úshin tólenetin tólem aqysyn alyp tastaý týraly talap qoiǵan.
Mańǵystaý oblysynyń ákimi Nurlan Noǵaev qoldanystaǵy zańnamaǵa sáikes jalǵa beriletin turǵyn úi jekeshelendirýge jatpaitynyn túsindirgen.
«Aqtaý qalasynda arendaǵa berilgen páterlerdiń jalǵa alý merzimine shekteý qoiylmaidy. Eger kelisimshartta tirkelgen adam qaitys bolǵan jaǵdaida jalǵa alý kelisimsharty qalǵan otbasy múshelerine uzartylyp beriledi.
Qoldanystaǵy «Turǵyn úi qatynastary týraly» QR Zańy boiynsha sizder turatyn páterler kommýnaldyq turǵyn úi qorynan satyp alý quqyǵynsyz beriledi. Jalǵa beriletin turǵyn úi jekeshelendirýge jatpaidy. Kommýnaldyq qyzmetterge qatysty, eger sizdiń tabysyńyz tólemdi tolyq óteýge múmkin bolmasa, onda «Turǵyn úi qatynastary» týraly Zańǵa sáikes qajetti qujattar jinap, turǵyn úi kómegin ala alasyz», - dedi Nurlan Noǵaev.
Baspanany jaldaý aqysy úidiń sharshy metrine bailanysty 8-den 12 myń teńgege deiin aýytqidy.
«Kezdesýge oblystyq máslihat depýtattary da qatysyp, jinalǵandardy komissiia jumysyn jalǵastyrýǵa shaqyrdy. Máslihattyń birqatar depýtaty analar kótergen máselelerdi qaraý úshin Parlamentke hat joldady. Kezdesý qorytyndysy boiynsha komissiia jumysyn jalǵastyrý týraly sheshim qabyldandy», - dep atap ótedi oblys ákimdiginiń baspasóz qyzmetinen.
