Parlament Májilisiniń depýtaty Nurlan Dýlatbekov Prezident Joldaýyna qatysty pikir bildirip, endigi kezekte Parlament qalai jumys júrgizetinine qatysty oiyn aitty, dep habarlaidy QazAqparat.
«Meniń oiymsha, búgingi Joldaýda eldegi eń ózekti máselelerdiń bári qamtyldy. Iaǵni, Prezident jaǵdaidy baqylap, bilip otyr. Biz jýyrda ǵana batys óńirinde bolyp, sailaýshylarymyzben kezdestik. Sonda aitylǵan problemalardyń barlyǵy búgingi Joldaýda kóterilip jatqanyna qatty qýanyp otyrmyn. Máselen, týristik klasterdi kóterýde qandai máselelerdi qaýzaý kerek, qandai suraqtardyń tóńireginde jumys isteý kerektigine Memleket basshysy jan-jaqty toqtaldy.
Men Prezident Joldaýyndaǵy kóp máselelerdiń ishinen halyqty áleýmettik qoldaý tetikterin erekshe atap óter edim. Onyń ishinde kólik qatynasyna qatysty máseleler kóterildi. Jańaózen qalasynda sailaýshylar Mańǵystaý óńirine jetý, temir jolmen qatynaý qiyndyǵyn, áýe qatynasynyń baǵasy shekten tys qymbat ekenin aitqan bolatyn. Búgin Prezidentimiz osy máselelerdi kóterdi», - dedi Nurlan Dýlatbekov Parlamenttiń birlesken otyrysynan keiin tilshilerdiń saýaldaryna jaýap bere otyryp.
Májilis depýtatynyń aitýyna qaraǵanda, Prezident kelesi jyly Uly Abaidyń 175 jyldyǵyn toi retinde atap ótip qana qoimai, aqyn shyǵarmalaryn basqa qyrynan uǵynýǵa shaqyryp otyr.
«Bul máseleler tóńireginde Parlamenttiń aldynda úlken mindetter tur. Prezident sailaýaldy baǵdarlamasyn tolyǵymen júzege asyrýǵa bekinip otyr. Parlament osy rette kóptegen zańdarǵa ózgerister engizýi tiis», - dedi májilismen.
Eske sala ketsek, búgin QR Prezidenti Qasym-Jomart Toqaev Qazaqstan halqyna Joldaýyn jariialady.
